एन्फाले कृष्ण थापासँग स्पष्टिकरण माग्यो


Published: September 17, 2015 | प्रकाशित: बिहिबार, भदौ ३१, २०७२

काठमाडौं, भदौ ३१ – एपिएफका प्रशिक्षक कृष्ण थापालाई लिगमा एन्फाको षडयन्त्र देख्नु तथा झापा र मोरङबीचको खेलमा मिलेमतोको आरोप लगाउनु महंगो परेको छ । त्यहि विषयलाई लिएर अखिल नेपाल फुटबल संघ (एन्फा) ले बिहीबार प्रशिक्षक थापासँग स्पष्टिकरण माग गरेको छ ।

Coach Krishna Thapa

रुस्लान थ्री स्टारसँगको खेलपछि मंगलबार थापाले भनेका थिए ‘झन्डै ५ महिनापछि लिग सुरु भयो । एन्फाले हामीविरुद्ध षडयन्त्र नगरेको भए हामी लिग रोकिएको अवधिभर अग्रस्थानमा हुन्थ्यौं । हामीलाई शीर्ष स्थानमा रहन नदिनकै लागि एन्फाले भुइँचालो गएको दिन वैशाख १२ मा पनि लिगको खेल गरायो ।,’ एन्फाले थापालाई थापालाई असोज २ गते १० बजे सम्म जवाफ पेश गर्न भनेको छ । ‘ सबै क्लबको प्रतिनिधिको सहभागितामा नियमानुसार बनाइएको खेलतालिकामा उहाँले कसरी एन्फाको षड्यन्त्र देख्नुभयो । त्यसमा जवाफ मागेका छौं ’एन्फाका एक अधिकारीले भनेका छन् । थापाले झापा र मोरङबीचको भइसकेको खेलमा मिलेमतो भएको र हुने खेलमा पनि त्यस्तै हुने अभिव्यक्ति दिएकोमात्र पनि एन्फाले जवाफमा मागेको छ ।

सोही पत्रकार सम्मेलनमा थापाले वैशाख १२ मा झापा र मोरङबीच भएको खेलमा मिलेमतो भएको र तीनै दुई टोलीबीच भदौ ३० मा हुने खेलमा पनि मिलेमतोको आशंका व्यक्त गरेका थिए । एन्फाले मिलेमतोको प्रमाण पेश गर्न भनेको छ । झापा र मोरङको आक्रोश झापा र मोरङ पनि एपिएफ प्रशिक्षक कृष्ण थापामाथि खनिएका छन् । मोरङ र झापाका अध्यक्षले संयुक्त विज्ञप्ति जारी गर्दैै थापालाई तत्काल बर्खास्त गरी कारबाही गर्न माग गरेका छन्् ।

मोरङ फुटबल क्लबका अध्यक्ष रविन दाहाल र रमपम झापा–११ का अध्यक्ष जलकुमार गुरुङद्वारा जारी संयुक्त विज्ञप्तिमा भनिएको छ, ‘झापा र मोरङबीच वैशाख १२ को खेलमा मिलेमतो भएको र भदौ ३० मा हुने खेलमा पनि मिलेमतो हुनेछ भनी व्यक्त धारणा अत्यन्तै निन्दनीय र खेलभावना विपरीत पाएका छौं ।’ उनीहरूले मिलेमतोलाई प्रमाणित गर्न चुनौती दिएका छन्

प्रतिकृया दिनुहोस

प्रतिकृया

Loading...