काठमाडौं (हाम्रो खेलकुद)- भारतको राँचीमा जारी चौथो दक्षिण एसियाली सिनियर एथलेटिक्स च्याम्पियनसिपको पहिलो दिनमा नेपालले ३ वटा कास्य पदक पदक जितेको छ।

नेपालले च्याम्पियनसिपमा महिला र पुरुष ५ हजार मिटर दौड र मिक्स रिले ४ गुणा ४ सय रिलेमा कास्य पदक जितेको हो।

सन्तोषी श्रेष्ठले महिला ५ हजार मिटर दौडमा कास्य पदक जितेकी छिन्। सन्तोषी ले १६ मिनेट ३६.६१ सेकेन्ड समयका साथ तेस्रो स्थान प्राप्त गरेकी हुन्। उनले कान्छीमाया कोजुको १६ मिनेट ४९ सेकेन्डको राष्ट्रिय कीर्तिमान तोडेकी छिन्। यो प्रतिस्पर्धामा स्वर्ण र रजत दुबै भारतीय खेलाडीले जितेका थिए।

सन्तोषीले सन् २०१९ मा नेपालमा आयोजना भएको १३ औं दक्षिण एसियाली खेलकुद (साग) मा १० हजार मिटर दौडमा स्वर्ण पदक जितेकी थिइन्।

त्यस्तै च्याम्पियनसिपमा मुकेश पालले पुरुष ५ हजार मिटर दौडमा कास्य पदक जितेका छन्। उनले १४ मिनेट २५.५४ सेकेन्डमा दौड पूरा गरेका हुन्। यसमा भारतले स्वर्ण र श्रीलंकाले रजत पदक जितेको थियो।

नेपाली टोलीले मिक्स रिलेमा कास्य पदक जितेको छ। रमिता कुमारी थारु, जयरानी थारु, साेम बहादुर कुमाल, राम प्रसाद थारु सम्मिलित टोलीले ४ गुणा ४ सय रिले दौडमा ३ मिनेट ३७.१६ सेकेन्डमा दौड पूरा गर्दै पदक जितेको हो।

त्यसमा भारतले स्वर्ण र श्रीलंकाले रजत‌ पदक जितेको थियो। भोलिसम्म चल्ने च्याम्पियनसिपमा नेपालका २६ खेलाडी सहभागी छन् ।