काठमाडौं (हाम्रो खेलकुद)- नेपालले भारतको राँचीमा भएको चौथो दक्षिण एसियाली सिनियर एथलेटिक्स च्याम्पियनसिपमा २ रजत र ४ कास्य पदक जितेको छ।

आइतवार सम्पन्न च्याम्पियनसिपमा सन्तोषी श्रेष्ठ र सोमबहादुर कुमालले दोहोरो पदक जितेका छन्।

सोमले ८ सय मिटर दौडमा रजत र ४ गुणा ४ सय मिक्स रिले दौडमा कास्य पदक जितेका छन् । सोमले पुरुष ८ सय मिटर दौड १ मिनेट ५२.०३ सेकेन्डमा दौड पूरा गर्दै दोस्रो स्थान पक्का गरेका हुन्।

सन्तोषीले महिला १० हजार र ५ हजार मिटर दौड दुबैमा राष्ट्रिय कीर्तिमानसहित कास्य पदक जितेकी हुन् ।
आइतवार १० हजार मिटर दौडमा सन्तोषीले ३४ मिनेट ४७.७७ सेकेन्डको राष्ट्रिय कीर्तिमान सहित तेस्रो स्थान प्राप्त गरेकी हुन्। सन्तोषीले कान्छीमाया कोजुको ३५.०३ मिनेटको कीर्तिमान तोडेकी हुन् ।

पहिलो दिन शुक्रवार सन्तोषीले  ५ हजार मिटर दौडमा कास्य पदक जितेकी थिइन् । उनले १६ मिनेट ३६.६१ सेकेन्ड समयका साथ तेस्रो स्थान प्राप्त गरेकी हुन्। उनले कान्छीमाया कोजुको  १६ मिनेट ४९ सेकेन्डको राष्ट्रिय कीर्तिमान तोडेकी छिन्।

सन्तोषीले सन् २०१९ मा नेपालमा आयोजना भएको १३ औं दक्षिण एसियाली खेलकुद (साग) मा १० हजार मिटर दौडमा स्वर्ण पदक जितेकी थिइन्।

राजन रोकायाले च्याम्पियनसिपको अन्तिम दिन पुरुष १० हजार मिटर दौडमा रजत पदक जितेका छन्। राजनले ३० मिनेट ३९.१५ सेकेन्डमा दौड पूरा गर्दै दोस्रो भएका हुन् ।

त्यस्तै च्याम्पियनसिपको पहिलो दिन मुकेश पालले पुरुष ५ हजार मिटर दौडमा कास्य पदक जितेका थिए। उनले १४ मिनेट २५.५४ सेकेन्डमा दौड पूरा गरेका हुन्।

मिक्स रिलेमा कास्य पदक जित्ने टोलीमा सोमसहित रमिता कुमारी थारु, जयरानी थारु, राम प्रसाद थारु थिए। टोलीले ४ गुणा ४ सय रिले दौडमा ३ मिनेट ३७.१६ सेकेन्डमा दौड पूरा गर्दै पदक जितेको थियो।

३ दिन सम्म चलेको च्याम्पियनसिपमा नेपालका २६ खेलाडी सहभागी थिए ।