काठमाडौं (हाम्रो खेलकुद) – अनिता बस्नेत र सावित्रा भण्डारीले केही मिनेटको अन्तरमा नै गोल गरेपछि नेपालले भुटानविरुद्ध ३-० को अग्रता लिएको छ ।

पहिलो हाफमा सावित्राको गोलमा १-० को अग्रता लिएको नेपालका लागि दोस्रो हाफको ४७औ मिनेटमा सावित्राको पासमा दीपा शाहीको प्रहार पोस्ट नजिकैबाट आकासियो । ५६औं मिनेटमा सावित्रा भण्डारीले एक्लैले बल अघि बढाउँदै पेनाल्टी बक्समा रेखा कुमारी पौडेललाई दिएको पासलाई भुटानी डिफेन्डरले क्लियर गरिन् । ६४औं मिनेटमा अनिता बस्नेतले एकल प्रयासमा गरेको प्रहार दोस्रो बार च्याप्दै थोरै बाहिरियो । ६८औं मिनेटमा सावित्राले व्यक्तिगत र टोलीका लागि दोस्रो गोल गर्द नेपाललाई २–० को अग्रता दिलाइन् ।

दोस्रो हाफको शुरुमै अमिशा कार्कीको स्थानमा मैदान छिरेकी रेखा कुमारी पौडेलको चलाखीपूर्ण पासलाई सावित्राले वान भर्सेस वानको स्थितिमा सहज फिनिस गरिन् । यससँगै सावित्रा भुटानविरुद्धको चौथो खेलमा लगातार गोल गर्न सफल भइन् । उनले यसअघि तेस्रो, चौथो र पाँचौ साफमा गोल गर्न सफल भएकी थिइन् । साफमा भुटानविरुद्ध उनको यो १०औं तथा सम्रगमा राष्ट्रिय टोलीबाट ४०औं गोल हो ।

७२ औं मिनेटमा अनिता बस्नेतले उत्कृष्ट गोल गर्दै नेपाललाई ३-० ले अघि बढाइन् । उनले पेनाल्टी क्षेत्र बाहिरबाट गरेको प्रहारलाई भुटानको गोलरक्षक संगीता मोंगरले बचाउन सकिनन् ।