काठमाडौं (हाम्रो खेलकुद) – फोर नेसन्स महिला अन्तराष्ट्रिय च्याम्पियनसिपको फाइनल खेलमा नेपाल र म्यानमारबीचको खेल जारी छ । पहिलो हाफ गोलरहित बराबरीमा सकिएको छ ।

खेलको २४ औं मिनेटमा नेपाल गोल खानबाट जोगियो । म्यानमारकी सान थाउ थाउले हानेको प्रहारमा गोलरक्षक अञ्जिला तुम्बाप्पो सुब्बा बिट भैसक्दा विमला विकले गोल लाइनबाट बचाइन् ।

खेलको ३५ औं मिनेटमा नेपालले गोल गर्ने मौका चुकायो । साम्बाले हानेको प्रहारलाई म्यानमारकी गोलरक्षक मो म्या म्या नेनले बचाइन् । रिबाउन्डमा साम्बाको हेडरमा रेखाले क्लोज रेन्जबाट हानेको प्रहारमा पनि किपर बाधक भइन् । क्लिएर हुन नसकेको बलमा सविताको प्रयास पनि सफल हुन सकेन् ।

४४ औं मिनेटमा नेपालले अर्को मौका गुमायो । रेनुका नगरकोटीले दिएको लामो क्रसमा गोल किपरले फुत्काएको बलमा क्लोज रेन्जमा रहेका साम्बा र रेखाले बल कनेक्ट गर्न सकेनन् । पहिलो हाफ गोल रहित बराबरीमा सकियो ।

आज नेपालले प्लेइङ इलेभेनमा दुई परिवर्तन गर्यो । गोलरक्षक अन्जना राना मगरको स्थानमा कप्तान तथा नियमित गोलरक्षक अञ्जिला तुम्बाप्पो सुब्बा र स्ट्राइकर रश्मी कुमारी घिसिङको स्थानमा रेखा पौडेलकाई प्रशिक्षक राजेन्द्र तामाङले उतारे । म्यानमारले भने आज ८ परिवर्तन गरेको छ।

फिफा वरियतामा म्यानमार नेपाल भन्दा ४८ स्थान माथि रहेको छ । म्यानमार ५५ र नेपाल १०३ स्थानमा रहेका छन् ।