एजेन्सी – स्पेनिस ला लिगा अन्तर्गत आइतबार राती जारी खेलमा रियल म्याड्रिडले एस्पान्योलविरुद्ध पहिलो हाफमा १-० को अग्रता बनाएको छ ।

खेलको पाँचौ मिनेटमा एस्पान्योलले अग्रता लिने सुवर्ण अवसर खेर फाल्यो । काउन्टर अट्याकमा अगाडी बढेको घरेलु टोलीका वु लेइको क्रसमा सर्जी डार्डरको प्रहारलाई राफाएल भारानले उत्कृष्ट ब्लक गर्दै खेल गोलरहित नै राखे ।

छैटौं मिनेटमा क्यासेमिरोको लामो दुरीको प्रयासलाई एस्पान्योलका गोलरक्षक डिएगो लोपेजले विफल पारे । लोपेज पोजिसनमा नभएको मौकामा क्यासेमिरोले आफ्नो हाफबाट गरेको लामो प्रहार लोपेजले एक हातले डाइभ दिँदै दोस्रो प्रयासमा मात्र बचाउन सकेका थिए ।

नवौं मिनेटमा क्यासेमिरोले कर्नरबाट आएको रिबाउन्डमा गरेको प्रहार गोललाइन नजिक रहेका कप्तान सर्जियो रामोसको टाउकोमा लाग्दै बाहिरियो । लगत्तै मार्सेलोले पेनाल्टी क्षेत्र बाहिरबाट गरेको प्रहार डिफेन्डरलाई लाग्दै बाहिरियो ।

२५ औं मिनेटमा वु लेइको प्रहार पोस्टभन्दा माथिबाट बाहिरियो ।  २७ औं मिनेटमा लेइले काउन्टरमा तीव्र गतिमा बल अगाडी बढाएपनि रामोससँग जुधेपछि आक्रमण पेनाल्टी क्षेत्र बाहिरनै नै रोकिन पुग्यो । ३१ औं मिनेटमा टोनी क्रुसको फ्रिकिकमा रामोसको हेडरले पोस्टको दिशा लिन सकेन ।

४४ औं मिनेटमा रियल म्याड्रिडले अग्रता लिने सुवर्ण अवसरको सदुपयोग गर्न सकेन । एकै मुभमा गोलरक्षक डिएगो लोपेजले तीन बचाउ गरेपछि रियल निराश बन्नुपरेको थियो । उनले करीम बेन्जेमा, क्यासेमिरो र इडेन हाजार्डको प्रहार विफल पारेका थिए ।

रियलले पहिलो हाफको अन्तिम मिनेटमा अग्रता लिन सफल रहयो । करीम बेन्जेमाले पेनाल्टी क्षेत्रभित्र ब्याकहिलमा दिएको पासलाई क्यासेमिरोले ६ यार्ड बक्सको भित्रबाट गोलमा परिणत गरे ।

रियलले यस खेलमा जित वा बराबरी हासिल गरे अंक तालिकाको शीर्षस्थानमा उक्लनेछ । बार्सिलोनाभन्दा १ अंक पछि रहेको रियल हेड टु हेडमा भने क्याटलान टोलीभन्दा माथि छ ।