एजेन्सी – स्पेनिस ला लिगा अन्तर्गत बार्सिलोना र एटलेटिको म्याड्रिडबीच जारि खेलको पहिलो हाफ १-१ को बराबरीमा सकिएको छ । बार्सिलोनाले खेलमा अग्रता लिएपनि एटलेटिकोले बराबरी गोल फर्काएको हो ।

खेलको ११ औं मिनेटमा नै बार्सिलोनाले अग्रता लिएको थियो । कप्तान लिओनेल मेस्सीको कर्नर प्रहारमा डिएगो कोस्टाले आफ्नै पोस्टमा गोल गरेपछि घरेलु टोली अगाडी बढेको थियो । त्यसअघि मेस्सीकै फ्रिकिकलाई कोस्टाले पोस्टको नजिकबाट क्लियर गरेपछि कर्नर प्राप्त भएको थियो ।

खेलको १९ औं मिनेटमा एटलेटिकोले बराबरी गोल फर्कायो । सौल निगुएजले दोस्रो पेनाल्टी प्रहारमा एटलेटिकोका लागि गोल गरेका थिए । आर्टुरो भिडालले यानिक करास्कोलाई पेनाल्टी क्षेत्रभित्र लडाएपछि रेफ्रीले पेनाल्टी दिएका थिए । तर डिएगो कोस्टाको प्रहारलाई गोलरक्षक मार्क आन्दर टेर स्टेगनले विफल पारे ।

रेफ्रीले भिडियो असिस्टेन्ट रेफ्री (भीएआर) को सहयता लिँदै पछिल्लो पेनाल्टीलाई मान्यता दिएनन् । गोलरक्षक स्टेगन कोस्टाले पेनाल्टी हान्नुअघि नै गोललाइनबाट अगाडी बढेको कारण एटलेटिकोले पुन: पेनाल्टी प्रहार गर्ने अवसर पाएको थियो । दोस्रो अवसरमा भने साउल निगुएजले गोल गर्दै खेल बराबरीमा ल्याए ।

४२ औं मिनेटमा मेस्सीले झन्डै ३० यार्ड टाढाबाट गरेको फ्रिकिकलाई गोलरक्षक यान ओब्लाकले उत्कृष्ट बचाउ गरे । इन्ज्युरी समयमा डिएगो कोस्टाको प्रयासलाई जोर्डी अल्बाले विफल पार्दै खेल बराबरीमा राखे ।

यस खेलमा बार्सिलोनाले जित हासिल गरे रियल म्याड्रिडलाई उछिन्दै शीर्षस्थानमा उक्लनेछ । बराबरी वा हारले भने बार्सिलोना दोस्रो स्थानमा रहँदै रियललाई अग्रता बढाउने अवसर हुनेछ । एटलेटिको भने तेस्रो स्थानमा नै यथावत रहनेछ ।