एजेन्सी – कप्तान श्रेयस ऐर र विकेटकिपर ऋषभ पन्तको उत्कृष्ट साझेदारीमा इन्डियन प्रिमियर लिग (आइपिएल) २०२० को फाइनलमा दिल्ली क्यापिटल्सले मुम्बई इन्डियन्सविरुद्ध पूनरागमन गरेको छ ।

दुबई इन्टरनेशल क्रिकेट स्टेडियममा टस जितेर पहिला ब्याटिङ रोजेको दिल्लीले १३ ओभरमा ३ विकेट गुमाउँदै ९९ रन बनाएको छ । दिल्लीका ऋषभ पन्त ३० बलमा १ चौका र २ छक्का सहित ४२ रनमा अविजित छन् । कप्तान श्रेयस ऐर ३० बलमा ४ चौका र १ छक्का सहित ३९ रनमा खेलि रहेका छन् । एक समय ३.३ ओभरमा २२-३ को अवस्थामा रहेको दिल्लीलाई चौथो विकेटका लागि ५७ बलमा ७७ रनको अविजित साझेदारी गर्दै राम्रो योगफलको बाटो देखाएका छन् ।

दिल्लीको सुरुवात भने खराब रह्यो । पहिलो बलमै ओपनर मार्कस स्टोइनिसलाई गुमाएको थियो । तीव्र गतिका बलर ट्रेन्ट बोल्टको बलमा स्टोइनिस इनसाइड एज लाग्दै विकेटकिपर क्विन्टन डी ककबाट समातिन पुगेपछि गोल्डेन डग आउट पेभिलिएन फर्केका थिए ।

बोल्टले नै मुम्बईलाई दोस्रो सफलता दिलाए । तेस्रो ओभरको चौथो बलमा अजिक्या रहाने लेग साइडमा सट खेल्नेक्रममा एज लाग्दै २ रनमा डी ककबाट समातिन पुगेका थिए । जुन समय दिल्लीले १६ रन बनाएको थियो ।

चौथो ओभरको तेस्रो बलमा स्पिनर जयन्त यादवले अर्का ओनपर शिखर धवनलाई १५ रनमा बोल्ड आउट गरे । धवनले १३ बलमा ३ चौका प्रहार गरे । धवन आउट हुँदा दिल्ली २२–३ को कमजोर अवस्थामा पुगेको थियो ।

मुम्बईका ट्रेन्ट बोल्टले ३ ओभरमा २४ रन खर्चेर २ विकेट लिएका छन् । जयन्त यादवले ३ ओभरमा १८ रन खर्चेर १ विकेट लिएका छन् ।