यो खेलका क्रममा तयार पारिएको समाचार थियो । खेलको नतिजा यसप्रकार छ : सन्दीपको ६ विकेटसँगै नेपालको कीर्तिमानी जित

काठमाडौं (हाम्रो खेलकुद) – लेगस्पिनर सन्दीप लाछिमानेको घातक बलिङमा नेपाल पपुवा न्युगिनीसँगको दोस्रो ओडिआई खेलमा जिततर्फ अघि बढेको छ ।

नेपालले प्रस्तुत गरेको २ सय ३४ रनको विजयी लक्ष्य पछ्याएको पिएनजीले १६ ओभरमा ६ विकेट गुमाउँदै ६५ रन बनाएको छ । पिएनजीका गौडी टोका ९ रनमा अविजित छन् । ओपनर लेगा सियाकालाई तीव्र गतिका बलर सोमपाल कामीले दोस्रो ओभरको तेस्रो बलमा ४ रनमा बोल्ड आउट गर्दै उत्कृष्ट सुरुवात दिलाएका थिए ।

अर्का तीव्र गातिका बलर विक्रम सोबले कप्तान असाद भालालाई चौथो ओभरको पाँचौं बलमा विकेटकिपर विनोद भण्डारीबाट एक रनमा क्याच गराउँदै पिएनजीलाई ११–२ को अवस्थामा पुर्याए । दशौं ओभरको चौथो बलमा टोनी उरालाई रोहितले १९ रनमा रन आउट गर्दै नेपाललाई महत्वपूर्ण सफलता दिलाए । उराले ३५ बलमा २ चौका प्रहार गरे ।

त्यसपछि सन्दीपले तीन विकेट लिँदै नेपाललाई सहज जिततर्फ अघि बढाएका थिए । सन्दीपले १२ औं ओभरको दोस्रो बलमा चार्ल्स अमिनीलाई १६ रनमा एलबीडब्लू आउट गरे । अमिनिले २५ बलमा १ चौका प्रहार गरे । सन्दीपले विकेटकिपर किप्लिङलाई ४ रनमा बोल्ड आउट गर्दा पिएनजी १३.४ ओभरमा ५२–५ को दयनीय अवस्थामा पुगेको थियो ।

सन्दीपले १६ औं ओभरको अन्तिम बलमा सेसे बाउलाई ११ रनमा बोल्ड आउट गरेपछि नेपाल जिततर्फ उन्मुख भएको छ । स्पिनर सन्दीप लामिछानेले ४ ओभरमा ५ रन खर्चेर ४ विकेट लिएका छन् । विक्रम सोब र सोमपाल कामीले एक एक विकेट लिएका छन् ।

त्यसअघि अल अमरेत क्रिकेट मैदान ओमानमा टस जितेर पहिला ब्याटिङ रोजेको नेपालले ४९.३ ओभरमा २ सय ३३ रनमा अल आउट भएको थियो । नेपालका लागि युवा ब्याट्सम्यान रोहित कुमार पौडेलले १ सय २३ बलमा २ चौका र ३ छक्का सहित सर्वाधिक ८६ रनको योगदान दिए । करण केसीले तल्लोक्रममा २६ बलमा २ चौका र ४ छक्का सहित ४२ रनको आक्रामक इनिङ खेल्दै आउट भएका थिए । कप्तान ज्ञानेन्द्र मल्ल ७० बलमा ३ चौका र २ छक्का सहित ४५ रनमा आउट भएका थिए ।

नेपालले पहिलो खेलमा पिएनजीलाई २ विकेटले पराजित गरेको थियो । नेपालले पहिलो पटक डे नाइट ओडिआई खेल खेलिरहेको छ । आइसिसी विश्वकप लिग–२ अन्तर्गत ओमान र अमेरिकासँग त्रिकोणात्मक ओडिआई सिरिजको तयारीको लागि नेपालले पपुवा न्युगिनीसँग दुई खेल खेलेको हो ।