काठमाडौं (हाम्रो खेलकुद) – आइसिसी विश्वकप लिग २ त्रिकोणात्मक ओडिआई सिरिज अन्तर्गत ओमानविरुद्ध दोस्रो खेलमा नेपालले बलिङतर्फ पनि खराब सुरुवात गरेको छ ।

नेपालले प्रस्तुत गरेको १ सय ९७ रनको विजयी लक्ष्य पछ्याएको ओमानले आक्रमक सुरुवात गर्दै ५ ओभरमा १ विकेट गुमाउँदै ५६ रन बनाएको छ । ओमानका जतिन्दर सिंह १७ बलमा ५ चौका र ४ छक्का सहित विष्फोटक इनिङ खेल्दै ४४ रनमा अविजित छन् । चौथो ओभरको चौथो बलमा तीव्र गतिका बलर करण केसीले सोहिब खानलाई विनोद भण्डारीबाट ७ रनमा क्याच आउट गराउँदै नेपाललाई पहिलो सफलता दिलाएका छन् ।

दोस्रो ओभरमा तीव्र गतिका बलर विक्रम सोबले दुई चौका र १ छक्का सहित कुल १८ रन खर्चेका थिए । पाँचौं ओभरमा सोमपाल कामीलाई जतिन्दर सिंहले ३ चौका र ३ छक्का सहित एकै ओभरमा ३० रन प्रहार गरेका थिए ।

त्यसअघि अल अमरेत क्रिकेट मैदानमा टस जितेर पहिला ब्याटिङ थालेको नेपाल ४७.४ ओभरमा १ सय ९६ रनमा अल आउट भएको थियो । नेपालका लागि आसिफले १ सय १२ बलमा ७ चौका र १ छक्का सहित सर्वाधिक ९० रनको योगदान दिए ।

आसिफ बाहेक अन्य ब्याट्सम्यानले राम्रो प्रदर्शन गर्न सकेनन् । रोहित कुमार पौडेल २०, करण केसी र ज्ञानेन्द्र मल्लले २१-२१ रन बनाए । ओमानका तीव्र गतिका बलर बिलाल खानले १० ओभरमा १ मेडन सहित ४७ रन खर्चेर सर्वाधिक ४ विकेट लिए ।