काठमाडौं (हाम्रो खेलकुद) – नेपालले त्रिकोणात्मक टि२० आई सिरिजको लिगको अन्तिम खेलमा आज मलेसियासँग खेल्दैछ । खेल दिउँसो १२ : ३० मा टियु मैदानमा सुरुहुनेछ । नेपाल लगातार तीन खेलमा जितका साथ फाइनलमा पुगि सकेको छ । नेपाललाई प्रतिष्ठाको लडाईं हो ।

तर मलेसियाको लागि यो खेल सेमिफाइनल सरह हुनेछ । मलेसिया यस खेलमा विजयी भएमा फाइनलमा पुग्नेछ । तर पराजित हुँदा भने पपुवा न्युगिनी फाइनलमा पुग्ने समिकरण छ । मलेसिया पराजित हुँदा दुबै टोलीको २–२ अंक हुनेछ । यो अवस्थामा पपुवा न्युगिनी नेटरनरेटमा माथि रहँदै फाइनलमा पुग्नेछ ।

नेपालले पहिलो खेलमा पिएनजीलाई १५ रन र दोस्रो खेलमा ३७ रनले हराएको थियो । मलेसियालाई नेपालले ६ विकेटले हराएको थियो । मलेसियाले पीएनजीलाई पहिलो खेलमा ८ रनले हराउँदा दोस्रो खेलमा ८ विकेटले पराजित भएको थियो । पछिल्लो खेलमा पीएनजीविरुद्ध करण केसीले ह्याट्रिक सहित पाँच विकेट लिँदै जित सहज बनाएका थिए ।

यो खेल प्रतिष्ठाको लडाई हुँदा नेपालले टोलीमा केहि परिवर्तन गर्नसक्छ । यस सिरिजमा मौका नपाएका विवेक यादव र सागर ढकाललाई आज नेपालले मौका दिनसक्छ । नेपालले आजको खेलमा आरिफ शेख र एक तीव्र गतिका बलरलाई विश्राम दिनसक्छ । तीव्र गतिका बलरमा नेपालले सोमपाल कामी, करण केसी र अभिनाश बोहरा छन् । करणले पछिल्लो खेलमा ह्याट्रिक सहित पाँच विकेट लिएको हुँदा उनलाई निरन्तरता दिने सम्भावना छ ।

सोमपाललाई फाइनल अघि विश्राम दिनसक्ने सम्भावना छ । ओपनर कुशल भुर्तेललाई जिम्मेवारीका साथ ठूलो इनिङ खेल्न आवश्यक छ । सुरुवात राम्रो गरेपनि ठूलो इनिङमा बदल्न सकेका छैनन् । रोहित पौडेल र दीपेन्द्रसिंह ऐरी तेस्रो र चौथो नम्बरमा हुनेछन् । पछिल्लो खेलमा सानदार डेब्यू गरेका आदिल अन्सारीमाथि धेरैको नजर हुनेछ । उनले पीएनजीविरुद्ध ११ बलमा ३ छक्कासहित कुल ३१ रन जोडेका थिए ।

मलेसियाका कप्तान अहमद फैज, सैद अजिज र विरनदीप सिंह ब्याटिङका प्रमुख हतियार हुन् । पीएनजीविरुद्ध सैद र फैज दुबैले अर्धशतक प्रहार गरेका थिए । बायाँ हाते ब्याटर सैद घातक बन्नसक्छन् । विरनदीपबाट मलेसिया नेपालविरुद्ध ठूलो अपेक्षा गर्नेछ । उनी चलेको खण्डमा विशाल योगफल बनाउन सक्छन् । स्पिनरमा पवनदीप सिंह छन् ।

पीएनजीविरुद्ध उनले ४ ओभरमा ४३ रन खर्चेका थिए । मलेसिया र नेपालबीच हालसम्म ७ टि२० आई खेल भएका छन् । नेपाल ६ खेलमा विजयी हुँदा १ खेलमा पराजित भएको छ । आज काठमाडौंको मौसम २० देखि २५ डिग्री सेल्सियस तापक्रम रहनेछ । खेल हुने समयमा हल्का वर्षाको सम्भावना छ । फाइनल सोमबार हुनेछ ।