काठमाडौं (हाम्रो खेलकुद) – नेपालले त्रिकोणात्मक टि२० आई सिरिजको लिगको अन्तिम खेलमा मलेसियासँग टस हारेर पहिला ब्याटिङ गर्ने भएको छ । टियु मैदानमा मलेसियाका कप्तान अहमद फैजले टस जितेर पहिला फिल्डिङ गर्ने निर्णय लिएका हुन् ।

नेपालले आज एक खेलाडी परिवर्तन गरेको छ । तीव्र गतिका बलर सोमपाल कामीलाई विश्राम दिँदा कमलसिंह ऐरीलाई मैदान उतारेको छ । टोलीमा अन्य भने परिवर्तन छैन ।

नेपाल लगातार तीन खेलमा जितका साथ फाइनलमा पुगि सकेको छ । नेपाललाई प्रतिष्ठाको लडाईं हो । तर मलेसियाको लागि यो खेल सेमिफाइनल सरह हुनेछ । मलेसिया यस खेलमा विजयी भएमा फाइनलमा पुग्नेछ । तर पराजित हुँदा भने पपुवा न्युगिनी फाइनलमा पुग्ने समिकरण छ । मलेसिया पराजित हुँदा दुबै टोलीको २–२ अंक हुनेछ । यो अवस्थामा पपुवा न्युगिनी नेटरनरेटमा माथि रहँदै फाइनलमा पुग्नेछ ।

नेपालले पहिलो खेलमा पिएनजीलाई १५ रन र दोस्रो खेलमा ३७ रनले हराएको थियो । मलेसियालाई नेपालले ६ विकेटले हराएको थियो । मलेसियाले पीएनजीलाई पहिलो खेलमा ८ रनले हराउँदा दोस्रो खेलमा ८ विकेटले पराजित भएको थियो । मलेसिया र नेपालबीच हालसम्म ७ टि२० आई खेल भएका छन् । नेपाल ६ खेलमा विजयी हुँदा १ खेलमा पराजित भएको छ । फाइनल सोमबार हुनेछ ।

नेपालको प्लेइङ ११ :

सन्दीप लामिछाने (कप्तान), आदिल अन्सारी, कुशल भुर्तेल, कमलसिंह ऐरी, दीपेन्द्रसिंह ऐरी, आसिफ शेख , करण केसी, अभिनाश बोहरा, दीलिप नाथ (विकेटकिपर), आरिफ शेख र रोहित पौडेल ।