एजेन्सी – ओपनर जतिन्दर सिंहको कीर्तिमानी शतकमा ओमानले आइसिसी विश्वकप लिग–२ अन्तर्गत पपुवा न्युगिनीलाई ७ विकेटले हराएको छ ।

जितको लागि २ सय २५ रनको विजयी लक्ष्य पछ्याएको ओमानले ४४.१ ओभरमा ३ विकेट गुमाउँदै पूरा गर्यो । ओमानको जितमा ओपनर जतिन्दर सिंहले १ सय १६ बलमा १३ चौकासहित १ सय १८ रनको शतकीय इनिङ खेले । उनको यो ओडिआई करिअरको तेस्रो शतक हो ।

ओमानबाट ओडिआईमा एक ब्याटरले बनाएको सर्वाधिक ठूलो स्कोर हो । जतिन्दरले अकिव इलियासले नेपालविरुद्ध २०२० मा बनाएको १ सय ९ रनको कीर्तिमान तोडेका हुन् । जतिन्दर ओमानबाट ओडिआईमा सर्वाधिक शतक बनाउने ब्याटर पनि बनेका छन् ।

ओमानको लागि यो सातौं ओडिआई शतक हो । यसअघि अकिब इलियासले २, शोएब खान र जिशान मकसुदले १–१ शतक प्रहार गरेका छन् । कप्तान खवर अली ९९ बलमा ३ चौका र १ छक्कासहित ५७ रनमा अविजित रहे । कश्याप प्रजापति २, शोएब खान १ र अयान खान २५ रनमा आउट भए । पिएनजीका सिमो कमियाले २ र नोर्मन भानुआले १ विकेट लिए ।

त्यसअघि दुबई इन्टरनेशल क्रिकेट स्टेडियम टस जितेर पहिला ब्याटिङ थालेको पीएनजीले निर्धारित ५० ओभरमा ९ विकेट गुमाउँदै २ सय २४ रन बनाएको थियो । पीएनजीका चाल्र्स अमिनीले ७७ बलमा ४ चौकासहित सर्वाधिक ५९ रन बनाए । लेगा सियाका ३०, असाद भाला २१, टोनी उरा १३, सेसे बाउ १४, राइली हेकुरे २६, नोर्मन भानुआ र चाद सोपर १९–१९ रनमा आउट भए ।

ओमानका बिलाल खानले १० ओभरमा २ मेडनसहित ३९ रन खर्चेर ३ विकेट लिए । फैज बट र नेस्टर धम्बाले २–२ विकेट लिए । ओमान ३० खेलमा १८ मा जित र १० मा हार सहित ३८ अंकका साथ शीर्षस्थानमा छ ।

पीएनजी १८ खेलमा १ मा जित र १७ मा हारका साथ पुछारमा छ । आज पीएनजी र स्कटल्यान्डबीच प्रतिस्पर्धा हुँदैछ । नेपाल १२ खेलमा ६ मा जित र ६ मा हार सहित छैटौं स्थानमा छ । नेपालले जुनमा अमेरिकामा त्रिकोणात्मक सिरिज खेल्नेछ ।