एजेन्सी – विश्व क्रिकेटका आक्रामक ब्याटिङ अलराउन्डर काइरन पोलार्डले अन्तर्राष्ट्रिय क्रिकेटबाट सन्न्यासको घोषणा गरेका छन् । पोलार्डले सामाजिक सन्जालमार्फत बुधबार सन्न्यासको घोषणा गरेका छन् ।

वेस्टइन्डिजको सिमित ओभरको कप्तान समेत रहेका पोलार्डले पछिल्लो समय कमजोर प्रदर्शनपनि सन्न्यास लिने निर्णय लिएका हुन् । वेस्टइन्डिजले २०१२ र २०१६ मा टि२० विश्वकप जित्दा उनी टोलीका सदस्य थिए । ३४ वर्षीय पोलार्डले वेस्टइन्डिजबाट १ सय २३ ओडिआई र १ सय १ टि२० आई खेल खेलेका छन् ।

पोलार्डले ओडिआईमा ३ शतक र १३ अर्धशतकसहित २ हजार ७ सय ६ रन बनाउनुको साथै ५५ विकेट लिएका छन् । टि२० आईमा ६ अर्धशतकसहित १ हजार ५ सय ६९ रन बनाउँदा ४२ विकेट लिएका छन् । पोलार्डले ५ सय ८७ टि२० क्रिकेटमा १ शतक र ५६ अर्धशतकसहित ११ हजार ५ सय ९ रन बनाउनुको साथै ३ सय ५ विकेट लिएका छन् ।

पोलार्ड तल्लोक्रममा विष्फोटक ब्याटिङ गर्दा मध्यगतिमा बलिङ गर्ने गर्दछन् । गतवर्ष टि२० विश्वकपमा खराब नतिजापछि पोलार्डलाई कप्तानी छाड्न दबाब पनि पर्दै आएको थियो । पोलार्डले २०१९ मा ओडिआई र टि२० आई दुबैको कप्तानी सम्हाल्लेका थिए । समग्रमा पोलार्डले वेस्टइन्डिजबाट टि२० आई र ओडिआईमा गरि ६१ खेलमा नेतृत्व गर्दा २५ मा जित र ३१ खेलमा हार बेहोरेका थिए ।

पोलार्डको सन्न्याससँगै वेस्टइन्डिजको सिमित ओभरको कप्तानी निकोलस पुरनले गर्ने सम्भावना उच्च छ । पुरन वेस्टइन्डिजको उपकप्तान हुन् । पोलार्डको अनुपस्थितमा पुरनले कप्तानी गरि सकेका छन् । बायाँ हाते विकेटकिपर पुरन युवा पुस्ताका एक उत्कृष्ट कप्तान र आक्रामक ब्याटर हुन् ।