एजेन्सी – ओपनर डेविड वार्नर र पृथ्वी शाको आक्रामक ब्याटिङमा दिल्ली क्यापिटल्सले इन्डियन प्रिमियर लिग (आइपिएल) २०२२ मा पन्जाब किंग्सलाई ९ विकेटले पराजित गरेको छ ।

जितका लागि १ सय १६ रनको विजयी लक्ष्य पछ्याएको दिल्लीले १०.३ ओभरमा १ विकेट गुमाउँदै पूरा गर्यो । दिल्लीको जितमा डेविड वार्नर ३० बलमा १० चौका र १ छक्कासहित ६० रनमा अविजित रहे ।

शा २० बलमा ७ चौका र १ छक्कासहित ४१ रनमा आउट भए । शरफराज खान १२ रनमा अविजित रहे । पहिलो विकेटका लागि वार्नर र शाले मात्र ६.३ ओभरमा ८३ रनको विष्फोटक सुरुवात दिलाउँदै तेस्रो जित पक्का गरेका थिए ।

त्यसअघि ब्रेबोन स्टेडियम मुम्बईमा टस हारेर ब्याटिङको निम्तो पाएको पन्जाब २० ओभरमा १ सय १५ रनमा अल आउट भयो । पन्जाबको जितेश शर्माले २३ बलमा ५ चौकासहित सर्वाधिक ३२ रन बनाए । कप्तान मयंक अग्रवाल १५ बलमा ४ चौकासहित २४ रनमा आउट भए ।

शिखर धवन र जोनी बेयरस्टो ९–९ रनमा आउट भए । लियाम लिभिङस्टोन २, शाहरुख खान १२ र कागिसो रबाडा २ रनमा आउट भए । दिल्लीका खलिल अहमद, ललित यादव, अक्षर पटेल र कुलदीप यादवले २–२ विकेट लिए ।

अंक तालिका

गुजरात ६ खेलमा ५ मा जित र १ मा हार सहित १० अंकका साथ शीर्षस्थानमा छ । बेंगलोर ७ खेलमा ५ मा जित र २ मा हार सहित १० अंकका साथ दोस्रो स्थानमा छ ।

राजस्थान रोयल्स ६ खेलमा ४ मा जित र २ मा हार सहित ८ अंकका साथ तेस्रो स्थानमा छ । लखनऊ ७ खेलमा ४ मा जित र ३ मा हार सहित चौथो स्थानमा छ । हैदराबाद पनि ६ खेलमा ४ मा जित र २ मा हार सहित ८ अंक भएपनि नेटरनरेटको कारण पाँचौं स्थानमा छ ।
दिल्ली ६ खेलमा ३ मा जित र ३ मा हार सहित छैटौं स्थानमा उक्लिएको छ ।

कोलकाता नाइट राइडर्स ७ खेलमा ३ मा जित र ४ मा हार सहित सातैं स्थानमा छ । पन्जाब ७ खेलमा ३ मा जित र ४ मा हार सहित आठौं स्थानमा छ । चेन्नई ६ खेलमा १ मा जित र ५ मा हार सहित नवौं स्थानमा छ । मुम्बई ६ खेलमा जित बिहीन हुँदै पुछारमा छ ।