काठमाडौं (हाम्रो खेलकुद) – जिम्बावे ए का कप्तान टोनी मुनयोङ्गाले नेपालसँगको पहिलो टि२० अभ्यास खेलमा विष्फोटक अर्धशतक पूरा गरेका छन् । टियु क्रिकेट मैदानमा १ सय ८२ रनको विजयी लक्ष्य पछ्याउनेक्रममा जिम्बावेले १४.२ ओभरमा २ विकेट गुमाउँदै १ सय ४५ रन बनाएको छ ।

जिम्बावेका कप्तान टोनी मुनयोङ्गा २३ बलमा ७ छक्कासहित ५० रनमा आउट भएका छन् । ओपनर तडिवानाशे मरुमानी ३३ बलमा ३ चौका र २ छक्कासहित ४५ रनमा अविजित छन् ।

ओपनर इन्सेन्ट कैयाले ३० बलमा ९ चौका सहित ४७ रनमा आउट भए । पहिलो विकेटका लाग मरुमानी र कैयाले ८.४ ओभरमा ७३ रनको साझेदारी गर्दै राम्रो सुरुवात दिलाए ।

सन्दीपले कैयालाई एलबीडब्लू आउट गर्दै साझेदारी तोडेका थिए । त्यसपछि मरुमानी र टोनीले दोस्रो विकेटका लागि ७२ रनको साझेदारी गरेका थिए । टोनीलाई स्पिनर बसिर अहमदले कट एण्ड बोल्ड आउट गरे ।

त्यसअघि टियु मैदानमा टस हारेर पहिला ब्याटिङ थालेको नेपालले निर्धारित २० ओेभरमा ५ विकेट गुमाउँदै १ सय ८१ रन बनाएको थियो । आदिल अन्सारी २७ बलमा ४ चौका र ३ छक्कासहित सर्वाधिक ४७ रनमा अविजित रहे । ओपनर कुशल भुर्तेलले ३१ बलमा ८ चौकासहित ४६ रनमा आउट भए ।