काठमाडौं (हाम्रो खेलकुद) – नेपालले जिम्बावे एसँग तीन टि२० अभ्यास खेल अन्तर्गत आज दोस्रो खेल खेल्दैछ । खेल नेपाली समय अनुसार दिउँसो १ बजे टियु क्रिकेट मैदानमा सुरुहुनेछ ।

नेपाल जितका साथ तीन खेलको सिरिज १–१ को बराबरी गर्ने सोचमा हुनेछ । जिम्बावे लगातार दुई खेलका साथ एक खेल अगावै सिरिज जित्ने सोचमा हुनेछ ।

पहिलो खेलमा नेपाल जिम्बावे ए सँग ६ विकेटले पराजित भएको थियो । कप्तान टोनी मुन्योंगाले २३ बलमा ७ छक्कासहित ५० रन बनाउँदै सहज जित दिलाएका थिए । ओपनर तडिवानाशे मरुमानीले ५६ रनको इनिङ खेलेका थिए । ओपनर इन्सेन्ट कैयाले पनि राम्रो सुरुवात दिएका थिए । नेपाली बलिङविरुद्ध टियुको ब्याटिङ सहयोगी पिचमा खुलेर रन बनाएका थिए ।

पहिलो खेलमा खराब बलिङ गर्नेक्रममा सन्दीपले ४ ओभरमा ५० रन र अभिनाश बोहराले २ ओभरमा ३० रन खर्चेका थिए ।
नेपालले आज अभिनाशकोे स्थानमा किशोर महतोलाई मौका दिनसक्छ । आरिफ शेखको स्थानमा विवेक यादवलाई खेलाउन सक्छ । ओपनर आसिफ शेख रन बनाउन संघर्ष गरेका छन् ।

कुशल भुर्तेल, दीपेन्द्रसिंह ऐरी र रोहित पौडेलले राम्रो प्रदर्शन गर्दै आएका छन् । यी ब्याटरलाई ठूलो इनिङमा बदल्न आवश्यक देखिन्छ । अभ्यास खेल हुँदा बिना दबाबमा खेल्न आवश्यक देखिन्छ ।

तर आज नेपाल र जिम्बावेबीचको खेल वर्षाको कारण प्रभावित हुनसक्ने सम्भावना छ । काठमाडौंमा सोमबार विहान सामान्य वर्षा भएको छ । दिउँसो पनि वर्षाको सम्भावना छ ।