एजेन्सी – युएईमा जारी फेयर ब्रेक इन्भिटेसनल टि२० क्रिकेट प्रतियोगितामा सीता रानामगर सम्मिलित टोर्नाडोस वुमन्स रुविना क्षेत्री बेलबासे रहेको बार्मी आर्मी वुमन्ससँग ८ विकेटले पराजित भएको छ ।

दुबई इन्टरनेशनल क्रिकेट स्टेडियममा टस हारेर ब्याटिङको निम्तो पाएको टोर्नाडोसले निर्धारित २० ओभरमा २ विकेट गुमाउँदै १ सय ५० रन बनाएको थियो । उसका लागि कप्तान स्टेफनी टेलरले ५४ बलमा ८ चौका र ३ छक्कासहित ७८ रनमा अविजित रहिन् । हारका बाबजुद उनी खेलको प्लेयर अफ द म्याच चुनिन् ।

सुने लुसले ५८ बलमा ७ चौका र १ छक्कासहित ६६ रनमा अविजित रहिन् । सुरुवाती दुई विकेट पाँच रन जोड्न गुमाएपनि लुस र टेलरले तेस्रो विकेटका लागि १ सय ४५ रनको अविजित शतकीय साझेदारी गरेका थिए । सुरुवाती दुबै विकेट रन आउट भएका थिए ।

जितका लागि १ सय ५१ रनको विजयी लक्ष्य पछ्याएको बार्मी आर्मीले १५.५ ओभरमा २ विकेट गुमाउँदै पूरा गर्यो । बार्मीकी ओपनर डिएन्ड्रा डोटिनले ४० बलमा ५ चौका र ३ छक्कासहित ५६ रनमा अविजित रहिन् । काविसा इगोडागेले ४२ बलमा ६ चौका र १ छक्कासहित ४३ रनमा आउट भइन् ।

लौरा वोल्भार्ड ८ रनमा आउट हुँदा कप्तान हेदर नाइट २० रनमा अविजित भइन् । दक्षिण अफ्रिका युवा स्टार लौरा सीता रानामगरको एलबीडब्लू आउटको सिकार बनेकी थिइन् । गत अप्रिलमा एकदिवसिय विश्वकपमा सानदार प्रदर्शन गरेकी लौराले ७४ वुमन्स ओडिआई र ३३ वुमन्स टि२० आई खेल खेलकी छिन् ।

क्लासले भरिपूर्ण २३ वर्षीय लौराले वुमन्स ओडिआईमा ३ शतक र २६ अर्धशतकसहित २ हजार ९ सय १५ रन बनाएकी छिन् । एकदिवसिय विश्वकपमा ८ खेलमा ५ अर्धशतकसहित ४ सय ३३ रन जोडेकी थिइन् ।

सीताले २ ओभरमा २४ रन खर्चेर १ विकेट लिइन् । रुविनलाई भने बार्मीले बेन्चमा राखेको थियो । सीताले तीन खेलमा २ विकेट लिएकी छिन् । बार्मीले अव मंगलबार साफायरसँग खेल्नेछ । टोर्नाडोसले बुधबार स्प्रिट वुमन्ससँग खेल्ने खेल तालिका छ ।