काठमाडौं (हाम्रो खेलकुद) – नेपालले युगान्डासँगको चौथो महिला टि२० आई खेलमा मध्यम ब्याटिङ सुरुवात गरेको छ । टियु क्रिकेट मैदानमा टस जितेर ब्याटिङ रोजेको नेपालले सुरुवाती १० ओभरमा ३ विकेट गुमाउँदै ६१ रन बनाएको छ ।

ओपनर ज्योति पाण्डे १३ बलमा ४ चौकासहित १७ रनमा कटएण्ड बोल्ड भइन् । विन्दु रावल ३० बलमा १ चौकासहित १५ रन बनाएकी छिन् । सरिता मगर २ रनमा अविजित छिन् ।

पहिलो विकेटका लागि ज्योति र विन्दुले ३.४ ओभरमा २९ रनको साझेदारी गरेका थिए । आक्रामक सुरुवाती दिलाएकी ज्योति जेनेत म्बावाजीबाट उत्कृष्ट क्याच भएकी थिइन् । कोन्सी एविकोले इन्दु बर्मालाई १ रनमा बोल्ड गरिन् । सीता रानामगर ८ बलमा २ चौकासहित ११ रनमा रन आउट भइन् ।

नेपालले आजको खेलमा युवा लेगस्पिनर हिरान्माय रोयलाई डेब्यू दिएको छ । नेपालले आजको खेलमा तीन परिवर्तन गरेको छ । तीव्र गतिकी बलर सबनम राई, संगीता राई र रोमा थापालाई बेन्चमा राखेको छ । हिरान्मायेसँगै अप्सरी बेगम र अस्मिना कर्माचार्यलाई आजको खेलमा मैदान उतारेको छ ।

नेपाल पहिलो खेलमा १२ रन, दोस्रो खेलमा १ विकेट र तेस्रो खेलमा ६ विकेटले पराजित भएको थियो । पाँच महिला टि२० आई सिरिज युगान्डाले दुई खेल अगावै जितेको छ ।

नेपालको प्लेइङ ११ :

रुविना क्षेत्री(कप्तान), इन्दु वर्मा, सीता रानामगर, ज्योति पाण्डे, कविता कुँवर, डली भट्ट, हिरान्माये रोय, सरिता मगर, अप्सरी बेगम, अस्मिना कर्माचार्य, विन्दु रावल