एजेन्सी – युएईले आइसिसी विश्वकप सुपर लिग–२ मा स्कटल्यान्डलाई ५ विकेटले पराजित गरेको छ । जितको लागि १ सय ७२ रनको विजयी लक्ष्य पछ्याएको युएईले ४४.१ ओभरमा ५ विकेट गुमाउँदै पूरा गर्यो । युएईको जितमा वृत्य अरविन्दले ९८ बलमा ५ चौकासहित सर्वाधिक ५४ रन बनाए ।

मोहम्मद वासिम ३६, चिराग सुरी ४ र सिपी रिजवान ३० रनमा आउट भए । जवार फरिद १९ बलमा ३ चौका र २ छक्कासहित ३२ रनमा अविजित रहे । स्कटल्यान्डले नौ बलर प्रयोग गरेको थियो । स्कटल्यान्डका शफ्यान शरिफले २ विकेट लिए ।

त्यसअघि मुसा क्रिकेट स्टेडियममा टस जितेर ब्याटिङ रोजेको स्कटल्यान्ड ५० ओभरमा १ सय ७१ रनमा अल आउट भएको थियो । स्कटल्यान्डका सफ्यान शरिफले ४८ बलमा १ चौकासहित सर्वाधिक ३० रन बनाए ।

जर्ज मुन्शेले ६८ बलमा २९ रन जोडे । म्याथ्यु क्रस ५, काइल कोट्जर १० र कलुम म्याकलेड २० रनमा आउट भए । युएईका कासिफ दाउद र कार्तिक मयप्पनले २–२ विकेट लिए ।

यस त्रिकोणात्मक सिरिजमा अमेरिका, स्कटल्यान्ड र युएईछन् । युएईले अव आज राती अमेरिकासँग खेल्नेछ । यस सिरिजपछि नेपाल, अमेरिका र ओमानबीच त्रिकोणात्मक सिरिज हुनेछ । स्कटल्यान्ड २० खेलमा १३ खेलमा जित र ५ खेलमा हारका साथ दोस्रो स्थानमा छ ।

युएई २१ खेलमा ११ मा जित र ८ मा हारका साथ तेस्रो स्थानमा छ । अमेरिका १९ खेलमा ९ मा जित र १० मा हार सहित चौथो स्थानमा छ । नेपाल भने १२ खेलमा ६ मा जित र ६ मा हार सहित छैटौं स्थानमा छ ।