ह्युस्टन, अमेरिका (हाम्रो खेलकुद) – नेपालले आइसिसी विश्वकप लिग २ त्रिकोणात्मक ओडिआई सिरिजमा ओमानविरुद्ध ब्याटिङमा संघर्ष गरि रहेको छ । जितको लागि २ सय १२ रनको मध्यम विजयी लक्ष्य पछ्याएको नेपालले ३२ ओभरमा ५ विकेट गुमाउँदै १ सय १० रन बनाएको छ ।

नेपालका आरिफ शेख ३० बलमा १ चौकासहित १५ रनमा अविजित छन् । विनोद भण्डारी १७ बलमा ३ रनमा अविजित छन् ।
तीव्र गतिका बलर बिलाल खानले तेस्रो ओभरको दोस्रो बलमा ओपनर सुवास खकुरेललाई ३ रनमा बोल्ड आउट गरे । २०२० पछि टोलीमा फर्किएका सुवासले राम्रो इनिङ खेल्न सकेनन् ।

त्यस्तै पाँच वर्षपछि सिनियर टोलीमा फर्किदै ओडिआईमा डेब्यू गरेका सुनिल धमला ३८ बलमा १२ रन बनाउँदै जिशान मकसुदको बलमा बोल्ड भए । उपकप्तान तथा प्रमुख ब्याटर रोहित पौडेल जिशान मकसुदको १९ औं ओभरको पहिलो बलमा खवर अलीबाट २० रनमा क्याच हुन पुगेपछि नेपाल ७१–३ को अवस्थामा पुगेको थियो । रोहितले १७ बलमा ३ चौका प्रहार गरे ।

युवा ब्याटर देव खनाललाई खवर अलीले ३४ रनमा बोल्ड आउट गरे । देवले ५३ बलमा ५ चौका प्रहार गरे । नेपालका प्रमुख हतियार दीपेन्द्रसिंह ऐरी अयान खानको बलमा जिशानबाट १६ रनमा क्याच भएपछि नेपालले संघर्ष गरेको छ ।

त्यसअघि ह्युस्टनस्थित मुसा क्रिकेट स्टेडियममा टस जितेर पहिला ब्याटिङ रोजेको ओमानले निर्धारित ५० ओभरमा ८ विकेट गुमाउँदै २ सय ११ रन बनाएको थियो । ओमानका कप्तान जिशान मकसुद १ सय २६ बलमा १२ चौकासहित १ सय ४ रनको अविजित शतकीय इनिङ खेले । नेपालका करण केसीले १० ओभरमा ३८ रन खर्चेर ५ विकेट लिए ।