एजेन्सी– कप्तान दासुन शनकाको विष्फोटक ब्याटिङमा श्रीलंकाले तेस्रो टि२० आई खेलमा अष्ट्रेलियामाथि ४ विकेटको अप्रत्याशित जित हात पारेको छ । योसँगै तीन टि२० आईको सिरिज श्रीलंकाले १–२ ले गुमाएको छ ।

जितको लागि १ सय ७७ रनको विजयी लक्ष्य पछ्याएको श्रीलंकाले १९.५ ओभरमा ६ विकेट गुमाउँदै पूरा गर्यो । श्रीलंका जितमा कप्तान दासुन शनका २५ बलमा ५ चौका र ४ छक्कासहित ५४ रनमा अविजित रहे ।

अन्तिम १८ बलमा जितको लागि ५९ रन चाहिँएको अवस्थामा विश्वस्तरिय तीव्र गतिका बलर अष्ट्रेलियाका बलरसामू विष्फोटक ब्याटिङका साथ श्रीलंकाको जित पक्का गराए ।

शनकाले १८ औं ओभरमा जोश हेजलवुडलाई दुई चौका र दुई छक्कासहित २२ रन जोडे । अन्तिम ६ बलमा जितको लागि १९ रन चाहिँएाको अवस्थामा शनकाले केन रिचर्ड्सलाई तेस्रो र चौथो बलमा चौका तथा पाँचौं बलमा छक्का सहित जित दिलाए ।
श्रीलंका धनुष्का गुणथिलका १५, पाथुम निसंका २७, चरिथ असलंका २६ र भानुका राजपक्षे १७ रनमा आउट भए ।

अष्ट्रेलियाका जोश हेजलवुड र मार्कस स्टोइनिसले २–२ विकेट लिए ।

त्यसअघि टस जितेर पहिला ब्याटिङ रोजेको अष्ट्रेलियाले निर्धारित २० ओभरमा ५ विकेट गुमाउँदै १ सय ७५ रन बनायो । अष्ट्रेलिया स्टिभ स्मिथ २७ बलमा २ चौका र २ छक्कासहित ३७ रनमा अविजित रहे । मार्कस स्टोइनिस २३ बलमा १ चौका र १ छक्कासहित ३८ रनमा आउट भए । आरोन फिन्च २९, डेविड वार्नर ३९ र ग्लेन म्याक्सवेल १६ रनमा आउट भए ।

श्रीलंका स्पिनर महेश थेक्सनाले सर्वाधिक दुई विकेट लिए । स्पिनर वानिन्दु हसरंगाको नाममा १ विकेट रह्यो ।