एजेन्सी– भारतले दोस्रो टि२० आई खेलमा दक्षिण अफ्रिकालाई १ सय ४९ रनको मध्यम लक्ष्य दिएको छ । बारबाती स्टेडियम कटकमा टस हारेर पहिला ब्याटिङको निम्तो पाएको भारतले निर्धारित २० ओभरमा ६ विकेट गुमाउँदै १ सय ४८ रन बनायो ।

भारतका श्रेयस ऐरले ३५ बलमा २ चौका र २ छक्कासहित सर्वाधिक ४० रनको योगदान दिए । दीनेश कार्तिक २१ बलमा २ चौका र २ छक्कासहित ३० रनमा अविजित रहे । हर्षल पटेल ९ बलमा २ चौकासहित १२ रनमा अविजित रहे । सातौं विकेटका लागि कार्तिक र पटेलले १८ बलमा ३६ रनको अविजित साझेदारी गरेका थिए ।

ओपनर ईशान किशनले २१ बलमा २ चौका र ३ छक्कासहित ३४ रन जोडे । दोस्रो विकेटका लागि किशन र ऐरले ३५ बलमा ४५ रनको साझेदारी गरेका थिए । पहिलो ओभरको पाँचौं बलमा कागिसो रबाडाले ओपनर ऋतुराज गायकवाडलाई केशव महाराजबाट एक रनमा क्याच गराएका थिए । एनरिच नोर्कियाको सातौं ओभरको चौथो बलमा डीप स्क्वायर लेगमा रास्सी भान डर डुसेनबाट क्याच गराउँदै किशनलाई पेभेलिएन फर्काए ।

कप्तान ऋषभ पन्त महाराजको बलमा डीप प्वान्टमा पाँच रनमा रास्सी भान डुसेनबाट क्याच भएपछि भारत समस्यामा परेको थियो । दक्षिण अफ्रिका एनरिच नोर्कियाले ४ ओभरमा ३६ रन खर्चेर २ विकेट लिए । पाँच टि२० सिरिजमा दक्षिण अफ्रिकाले १–० को अग्रता लिएको छ ।

पहिलो टि२० खेलमा भारतलाई दक्षिण अफ्रिकाले ७ विकेटले हराएको थियो । जसक्रममा दक्षिण अफ्रिकाले २ सय १२ रनको विशाल लक्ष्य १९.१ ओभरमा पूरा गरेको थियो ।