ह्युस्टन (हाम्रो खेलकुद) – नेपालले आइसिसी विश्वकप लिग–२ एक स्थान सुधार गरेको छ। नेपालले बुधबार विहान ओमानलाई ७ विकेटले हराउँदै आइसिसी विश्वकप लिग २ को अंक तालिकामा पाँचौं स्थानमा उक्लिएको छ ।

नेपाल १५ खेलमा ७ मा जित र ७ मा हारका साथ १५ अंक जोड्लै पाँचौं स्थानमा उक्लिएको छ । नेपालले नामिबियालाई पछि पारेको हो । नामिबिया १४ खेलमा ७ मा जित र ७ मा हार सहित १४ अंकका साथ छैटौं स्थानमा पुगेको छ ।

आइसिसी विश्वकप लिग २मा आफ्नो पुरै ३६ खेल खेल्ने ओमान पहिलो टोली बनेको छ । ओमान ३६ खेलमा २१ मा जित र १३ मा हारका साथ ४४ अंक जोड्दै शीर्षस्थानमा छ ।

स्कटल्यान्ड २० खेलमा १३ मा जित र ५ मा हारका साथ २८ अंक जोड्दै दोस्रो स्थानमा छ । युएई २२ खेलमा १२ मा जित र ८ मा हारसहित २६ अंकका साथ तेस्रो स्थानमा छ । अमेरिका २३ खेलमा १० मा जित र १२ मा हारका साथ २१ अंक जोड्दै चौथो स्थानमा छ ।

पपुवा न्युगिनी २० खेलमा १ मा जित र १९ मा हारका साथ पुछारमा छ । अंक तालिका शीर्ष तीनमा रहने टोलीले आगमी वर्ष हुने एकदिवसिय विश्वकप छनोट सोझैं खेल्न पाउनेछन् । पुछारका चार टोलीले प्लेअफ खेल्नुपर्ने हुन्छ । ओडिआई मान्यता प्राप्त गर्न यस अंक तालिका निर्णाक हुने अनुमान गरिएको छ ।

जितको लागि १ सय ६४ रनको मध्यम विजयी लक्ष्य पछ्याएको नेपालले ३३.१ ओभरमा ३ विकेट गुमाउँदै पूरा गर्यो । नेपालको जितमा आसिफ शेखले ८६ बलमा ७ चौका र १ छक्कासहित सर्वाधिक ६२ रनको योगदान दिए । कुशल भुर्तेल ७५ बलमा ५ चौकासहित ५६ रनमा क्याच आउट भए ।

त्यसअघि ह्युस्टनस्थित मुसा क्रिकेट स्टेडियममा टस जितेर पहिला ब्याटिङ थालेको ओमान ४६।५ ओभरमा १ सय ६३ रनमा अल आउट भयो । ओमानका कप्तान जिशान मकसुदले १ सय बलमा ३ चौकासहित सर्वाधिक ५२ रन बनाए । करण केसीले ९ ओभरमा ३३ रन खर्चेर ५ विकेट लिए ।

नेपाल र ओमानबीचको सम्पूर्ण जानकारी : अमेरिका भ्रमणमा नेपालको पहिलो जित