एजेन्सी – नेपालले एसिसी महिला टि२० च्याम्पियनसिपमा हङकङविरुद्ध मध्यम सुरुवात गरेको छ । मलेसियाको किनरारा ओभलमा टस जितेर पहिला ब्याटिङ थालेको नेपालले ७ ओभरमा २ विकेट गुमाउँदै २९ रन बनाएको छ । नेपालकी ओपनर विन्दु रावल २२ बलमा ३ चौकासहित १७ रनमा अविजित छिन् ।

नेपाललाई ओपनर सीता रानामगर र विन्दु रावलले ३.४ ओभरमा १८ रन जोड्दै मध्यम सुरुवात दिलाएका थिए । सीता १० बलमा १ चौकासहित ९ रनमा रन आउट भइन् । शीर्षक्रमकी ब्याटर इन्दु बर्मा १० बल खेल्दा खाता नखोली बोल्ड आउट भइन् । इन्दु बेट्टी चानको सातौं ओभरको अन्तिम बलमा बोल्ड भइन् ।

समूह बी मा रहेको नेपाल ३ खेलमा ६ अंकका साथ सेमिफाइनलमा पुगि सकेको छ । नेपालले भुटानलाई ५० रन, कुवेतलाई २५ रन र बहराइनलाई ८ विकेटले पराजित गरेको थियो । हङकङ २ खेलमा ४ अंकका साथ दोस्रो स्थानमा छ । हङकङले भुटानलाई १४ रन र बहराइनलाई ८ विकेटले पराजित गरेको थियो ।

आजको खेलको नतिजाले नेपालले सेमिफाइनलमा कुन टोलीसँग भिड्ने निर्धारण हुनेछ । नेपाल विजयी हुँदा समूह ए को उपविजेता र पराजित हुँदा समूह ए को विजेतासँग खेल्नेछ । समूह ए मा युएई ३ खेलमा ५ अंकका साथ शीर्षस्थानमा छ । मलेसिया ३ खेलमा २ मा जित र १ मा हारका साथ ४ अंक जोड्दै दोस्रो स्थानमा छ ।

फाइनल पुग्ने दुई टोलीले एसिया कप महिला टि२० प्रतियोगिता खेल्न पाउनेछन् । जहाँ भारत, पाकिस्तान, बंगलादेश, श्रीलंका टेस्ट टोली हुनेछन् ।

नेपालको प्लेइङ ११ :

रुविना क्षेत्री बेलबासे (कप्तान), इन्दु बर्मा, कविता जोशी, कविता कुँवर, काजोल श्रेष्ठ, विन्दु रावल, ममता चौधरी, संगिता राई, सबनम राई, सीता रानामगर र अप्सरी बेगम