काठमाडौं (हाम्रो खेलकुद) – नेपालले दोस्रो एकदिवसिय अभ्यास खेलमा आज क्यानाडासँग खेल्दैछ । खेल नेपाली समय अनुसार राती ८ : ४५ मा क्यानाडाको किंग सिटीमा रहेको मेपल लीफ क्रिकेट मैदानमा सुरुहुनेछ । पहिलोे खेल वर्षाको कारण मंगलबार राती रद्ध भएको थियो । क्यानाडा भ्रमणमा यो खेल नेपालको अन्तिम हुनेछ ।

नेपाल क्यानाडामाथि सानदार जितका साथ आइसिसी विश्वकप लिग–२ त्रिकोणात्मक ओडिआई सिरिज खेल्न स्कटल्यान्ड जाने सोचमा हुनेछ । नेपालले सुरुवाती दुई अभ्यास खेलमा ओन्टारियो क्रिकेट क्लबलाई ६९ रन र ५५ रनले हराएको थियो ।

क्यानानडो बातावरण र स्कटल्यान्डको मिल्दोजुल्दो छ । त्यसैको कारण नेपाल क्यानाडामा अभ्यास गर्न गएको हो । टि२० खेलमा रोहित पौडेलले ७१ र दीपेन्द्रसिंह ऐरीले ५४ रनको इनिङ खेलेका थिए । दीपेन्द्रले ५० ओभरको खेलमा संघर्ष गर्दै आएका छन् ।

नेपाल दीपेन्द्रबाट ठूलो इनिङ चाहन्छ । नेपालको ओपनिङ आसिफ शेख र कुशल भुर्तेलले गर्नेछन् । तेस्रो नम्बरमा देव खनाल हुनेछन् । देवबाट नेपाल ठूलो आशा राख्नेछ ।

दीपेन्द्र र रोहितको प्रदर्शन महत्वपूर्ण हुनेछ । नेपालले आरिफ शेख, विनोद भण्डारी र आदिल अन्सारीलाई तल्लोक्रममा खेलाउनेछ । करण केसी र सोमपाल कामी तीव्र गतिका बलरको रुपमा रहनेछन् । नेपालले सोमपाल र करण मध्य एकलाई विश्राम दिएर किशोर महतोलाई मौका दिनसक्छ । सन्दीप प्रमुख बलिङ हतियार तथा स्पिनर हुन् । आरिफको स्थानमा बसिर अहमदलाई मौका दिएर हेर्न सक्ने सम्भावना पनि रहन्छ ।

उता क्यानाडाको कप्तानी साद बिन जाफरले गर्नेछन् । रयान खान पठान उपकप्तानको रुपमा छन् । क्यानाडाले पछिल्लो समय अन्तर्राष्ट्रिय क्रिकेटमा संघर्ष गरेको छ । घरेलु मैदानको फाइदा उठाउँदै क्यानाडा उच्च प्रदर्शन गर्न चाहन्छ । क्यानाडाले नेपालसँग खेल्ने टोलीमा नयाँ खेलाडीलाई मौका दिएको छ । घरेलु मैदान र समर्थकको फाइदा उठाउँदै सानदार जित निकाल्न चाहन्छ ।

नेपाल, स्कटल्यान्ड र नामिबियाबीच त्रिकोणात्मक ओडिआई सिरिज हुनेछ । नेपाललाई आगमी वर्ष हुने एकदिवसिय विश्वकप ग्लोबल छनोट सिधैं खेल्न र ओडिआई मान्यतालाई निरन्रता दिन बाँकी सबै खेल खेल्नु पर्ने हुन्छ । नेपाल १६ खेलमा ७ मा जित, ८ मा हार र १ खेल टाईका साथ १५ अंक जोड्दै पाँचौं स्थानमा छ ।

नेपाललाई सिधैं विश्वकप ग्लोबल छनोट खेल्न शीर्ष तीनमा पर्नुपर्ने हुन्छ । अन्यथा प्लेअफ खेल्नुपर्ने हुन्छ । प्लेअफबाट ६ टोलीको खेलमा पुन शीर्ष दुईमा पर्न सके विश्वकप ग्लोबल छनोट खेल्न पाउनेछ । ओडिआई मान्यतालाई निरन्तरता दिन अंक तालिकामा शीर्ष पाँचमा पर्नुपर्ने हुन्छ ।

नेपालको टोली :

सन्दीप लामिछाने (कप्तान), रोहित पौडेल (उपकप्तान), आसिफ शेख (विकेटकिपर), कुशल भुर्तेल, देव खनाल, दीपेन्द्रसिंह ऐरी, आरिफ शेख, करण केसी, सोमपाल कामी, आदिल अन्सारी, बसिर अहमद, किशोर महतो, पवन सरार्फ र विनोद भण्डारी (विकेटकिपर) ।

स्कटल्यान्ड भ्रमणमा नेपालको खेल तालिका

असार २७ ( जुलाई ११) – नामिवियाविरुद्ध नेपाल

असार २९ ( जुलाई १३) – स्कटल्यान्डविरुद्ध नेपाल

असार ३२ ( जुलाई १६) – नेपालविरुद्ध नामिबिया

साउन १ ( जुलाई १७) – नेपालविरुद्ध स्कटल्यान्ड