एजेन्सी – अलराउन्डर अक्षर पटेलको आक्रामक ब्याटिङमा भारतले दोस्रो ओडिआई खेलमा वेस्टइन्डिजमाथि दुई विकेटको रोमान्चक जित हात पारेको छ । योसँगै तीन ओडिआई खेलको सिरिज भारतले एक खेल अगावै जितेको छ । जितको लागि ३ सय १२ रनको विजयी लक्ष्य पछ्याउनेक्रममा भारतले ४९.४ ओभरमा ८ विकेट गुमाउँदै पूरा गर्यो ।

भारतको जितमा अक्षर पटेल ३५ बलमा ३ चौका र ५ छक्कासहित ६४ रनमा अविजित रहे । पटेलले २७ बलमा ओडिआई करिअरको पहिलो अर्धशतक अर्धशतक हानेका थिए ।

भारतलाई अन्तिम ६ बलमा जितको लागि ८ रन चाहिँएको थियो । वेस्टइन्डिजका तीव्र गतिका बलर काइल मेयर्सले पहिलो बल पटेललाई डट राखे । दोस्रो बलमा पटेलले एक रन लिए । तेस्रो बलमा मोहम्मद शिराजले एक रन लिएपछि बाँकी तीन बलमा ६ रन चाहिँएको थियो ।

चौथो बलमा अक्षरले लङअफमा छक्का हान्दै भारतलाई रोमान्चक जित दिलाए । युवा ब्याटर श्रेयस ऐर ७१ बलमा ४ चौका र १ छक्कासहित ६३ रनमा आउट भए । सञ्जु स्यामसन ५१ बलमा ३ चौका र ३ छक्कासहित ५४ रनमा रन आउट भए । सुभमन गिल ४९ बलमा ५ चौकासहित ४३ रनमा आउट भए । कप्तान शिखर धवन ३१ बलमा १३ र सूर्य कुमार यादव ९ रनमा आउट भए ।

तल्लोक्रमका दीपक हुडा ३६ बलमा २ चौकासहित ३३, शार्दुल ठाकुर ३ र आवेश खान १० रनमा आउट भए । वेस्टइन्डिजका अल्जारी जोशेफ र काइल मेयर्सले दुई दुई विकेट लिए ।

त्यसअघि क्विन पार्क ओभलमा टस जितेर पहिला ब्याटिङ थालेको वेस्टइन्डिजले निर्धारित ५० ओभरमा ६ विकेट गुमाउँदै ३ सय ११ रन बनाएको थियो । वेस्टइन्डिजका ओपनर शाई होपले १ सय ३५ बलमा ८ चौका र ३ छक्कासहित सर्वाधिक १ सय १५ रनको शतकीय इनिङ खेलेका थिए । होपले आफ्नो ओडिआई करिअरको एक सय औं खेलमा शतक हानेका हुन् ।

उनले स्पिनर युजभेन्द्र चहललाई छक्का हान्दै ओडिआई करिअरको १३ औं शतक पूरा गरे । चौथो विकेटका लागि कप्तान निकोलस पुरन र शाई होपले १ सय १७ रनको शतकीय साझेदारी गरेका थिए । पुरनले ७७ बलमा १ चौका र ६ छक्कासहित ७४ रन बनाए । उनी आवेश खानको बलमा बोल्ड भएका थिए ।

ओपनर काईल मेयर्स २३ बलमा ६ चौका र १ छक्कासहित ३९ रनको आक्रामक इनिङ खेल्दै दीपक हुडाको बलमा क्याच एण्ड बोल्ड भए । शम्राह ब्रुक्स ३६ बलमा ५ चौकासहित ३५ र ब्रेन्डन किंग डक आउट भए ।

रोभम्यान पावेल १३, रोमारियो शेफर्ड १५ र अकिल हुसैनले १३ रन बनाए । भारतका शार्दुल ठाकुरले ७ ओभरमा ५४ रन खर्चेर ३ विकेट लिए । दीपक हुडा, अक्षर पटेल र युजभेन्द्र चहलले एक एक विकेट लिए ।

पहिलो खेलमा भारत तीन रनले विजयी भएको थियो । तेस्रो खेल बुधबार हुनेछ । त्यसपछि पाँच टि२० आई खेलको सिरिज हुनेछ ।