काठमाडौं (हाम्रो खेलकुद) – केन्याको पुरुष राष्ट्रिय क्रिकेट टोलीले नेपाललाई सिरिज खेल्न प्रस्ताव गरेको छ । केन्याले अगष्ट चौथो साताको लागि सिरिज खेल्न प्रस्ताव गरेको नेपाल क्रिकेट संघ (क्यान) का जनरल म्यानेजर वृतान्त खनालले जानकारी दिए ।

‘केन्यासँग सिरिज खेल्ने प्रस्ताव आएको छ । जुन समयमा वहाँहरुले प्रस्ताव गर्नुभएको छ त्यो समयमा नेपालमा क्रिकेट हुँदैन । किनभने अगष्टको मध्य समयमा वर्षा हुन्छ । यो बीचमा केन्या बाहेक अरु देशबाट सिरिज खेल्न प्रस्ताव आएको छैन । हाम्रो तालिका पनि खाली छ’, खनालले भने ।

केन्या सन् २००० को समयमा एसोसियट क्रिकेटकै सर्वाधिक बलियो टोली थियो । केन्या २००३ को विश्वकपमा टेस्ट टोलीलाई हराउने एसोसिएट टोली थियो । त्यसबेला विश्वकपको सेमिफाइनलमा केन्या भारतसँग ९१ रनले पराजित भएको थियो ।

उक्त विश्वकपमा केन्याले श्रीलंका, जिम्बावे, बंगलादेशलाई हराउँदै सेमिफाइनल खेल्दै विश्व क्रिकेटमा सनसनी मच्चाएको थियो । पछिल्लो एक दशकमा भने केन्याले आफ्नो विरासत गुमाएको छ । असल नेतृत्व र आन्तरिक राजनीतिको कारण कमजोर बन्दै गएको छ ।

खनाल सिरिज खेल्ने सम्भावना रहेको बताउँछन् । ‘हाम्रो लागि हाई पर्फर्मेन्सको अवसर पनि हो । यो विषयमा बोर्ड सकरात्मक छ । हामी केन्या जान्छौं होला । अगष्ट चौथो साताको प्रस्ताव गरेका छौं । सायद हामीले खेल्छौं होला । तर आर्थिक विषयमा छलफल गर्नुपर्छ’, खनालले भने ।

नेपाल र केन्या दुवैले २०२३ मा हुने एकदिवसिय विश्वकप छनोटको प्रक्रिया खेलेका छन् । नेपालले आइसिसी विश्वकप लिग–२ त्रिकोणात्मक ओडिआई सिरिज खेल्दै आएको छ । केन्याले क्रिकेट विश्वकप च्यालेन्ज लिग बी खेलेको छ । जसमा केन्या, हङकङ, इटाली, बर्मुडा, जर्सी र युगान्डा छन् ।

च्यालेन्ज लिगको शीर्षस्थानमा रहने टोलीले विश्वकप ग्लोबल छनोटमा पुग्ने प्लेअफ खेल्नुपर्ने हुन्छ । यता नेपाल भने लिग-२ को शीर्ष ५ स्थानमा रहेमा सोझै विश्वकप ग्लोबल छनोट खेल्नेछ । अन्यथा प्लेअफ खेल्नुपर्ने हुन्छ । वृतान्त टि२० र एकदिवसिय के कति खेलाउने क्यानका क्रिकेट म्यानेजर विनोद दासको निर्णयमा भर पर्ने बताउँछन् ।