एजेन्सी – दक्षिण अफ्रिका र इंग्ल्यान्डबीचको तेस्रो तथा अन्तिम खेल आज हुँदैछ । खेल नेपाली समय अनुसार ७ ः १५ मा साउथह्याप्टनमा सुरु हुनेछ । तीन टि२० आई खेलको सिरिज १–१ को बराबरीमा छ । पहिलो खेलमा इंग्ल्यान्ड ४१ रनले विजयी हुँदा दोस्रो खेलमा ५८ रनले पराजित भएको थियो ।

इंग्ल्यान्डका जोनी बेयरस्टो र मोईन अली उच्च लयमा छन् । पहिलो खेलमा जोनी बेयरस्टाले ५३ बलमा ८ छक्का र ३ चौकासहित कुल ९० र मोईन अलीले १८ बलमा ५२ रन जोडेका थिए ।

यी दुई ब्याटर बाहेक अन्यले राम्रो गर्न सकेका छैनन् । ओपनर तथा कप्तान जस बटलर सुरुवात राम्रो दिएपनि ठूलो इनिङ खेल्न सकेका छैनन् । अर्का ओपनर जेसन रोय लगातार संघर्ष गर्दै आएका छन् । रोयको स्थानमा इंग्ल्यान्डले फिलिप साल्टलाई मौका दिनसक्छ ।

प्रमुख ब्याटर डेविड मलान र लियाम लिभिङस्टोनबाट इंग्ल्यान्ड उत्कृष्ट प्रदर्शन चाहन्छ । लिभिङस्टोन ठूला सटका लागि चर्चित छन् । इंग्ल्यान्डको तीव्र गतिको बलिङ कमजोरीको रुपमा छ । रिस टोप्ली, क्रिस जोर्डन, साम करन र रिचर्ड ग्लेसन छन् । करन र ग्लेसन मध्य एकलाई बेन्चमा राखेर डेविड विल्लीलाई आज मैदान उतार्न सक्छ । स्पिनरमा मोईन अली र आदिल राशिद हुनेछन् ।

यता दक्षिण अफ्रिकाका ओपनर रिजा हेनड्रिक्सले दुबै खेलमा अर्धशतक हानेका थिए । राइली रोसोले ९६ रनको अविजित इनिङ खेल्दै दोस्रो खेलमा जित दिलाएका थिए । अनुभवी खेलाडी रोसो र लयमा रहेका हेनड्रिक्सको प्रदर्शन महत्वपूर्ण हुनेछ ।
ओपनर क्विन्टन डि कक र कप्तान डेविड मिलरबाट उच्च प्रदर्शन चाहन्छ ।

युवा स्टार ट्रिस्टन स्टब्सले पहिलो खेलमा ८ छक्कासहित ७२ रनको इनिङ खेलेका थिए । स्टब्स घातक बन्नसक्छन् । हेनरिक क्लासेनको स्थानमा रास्सी भान डर डुसेनलाई मैदान उतार्न सक्छ ।

एन्डिलो फेहवकुवलोको स्थानमा एनरिच नोर्कियालाई मौका दिनसक्छ । कागिसो रबाडा, लुन्गी एनगिडी र एनरिच नोर्किया तीव्र गतिका बलिङ हतियार हुनेछन् । केशव महाराजको स्थानमा ड्वेन प्रिटोरियसले मौका पाउनसक्छन् । स्पिनरमा तबरेज शाम्सीले निरन्तरता पाउनेछन् । यस खेलपछि यी दुईदेशबीच तीन टेस्ट खेलको सिरिज हुनेछ ।