एजेन्सी – जिम्बावेका अलराउन्डर रयान बर्लले बंगलादेशसँगको तेस्रो टि२० आई खेलमा एकै ओभरमा पाँच छक्का र एक चौकासहित कुल ३४ रन प्रहार गरेका छन् । बर्लको आक्रामक ब्याटिङको सहयोगमा जिम्बावेले बंगलादेशलाई १ सय ५७ रनको मध्यम लक्ष्य दिएको छ ।

हरारे स्पोर्ट्स क्लबमा टस जितेर पहिला ब्याटिङ थालेको जिम्बावेले निर्धारित २० ओभरमा ८ विकेट गुमाउँदै १ सय ५६ रन बनायो । जिम्बावेका रयान बर्लले २८ बलमा २ चौका र ६ छक्कासहित सर्वाधिक ५४ रन बनाए । उनको टि२० आई करिअरको दोस्रो अर्धशतक हो ।

बर्लले १५ औं ओभरमा ३४ रन जोडेका थिए । बर्लले स्पिनर नासुम अहमदलाई सुरुवाती चार बलमा लगातार छक्का प्रहार गरेका थिए । त्यसपछि पाँचौं बलमा उनले चौका र छैटौं बलमा छक्का प्रहार गरेका थिए । बर्लले मेहदी हसनलाई छक्का हान्दै २४ बलमा अर्धशतक पूरा गरे । बर्लले गतवर्ष एभरेष्ट प्रिमियर लिग काठमाडौं किंग्स इलेभेनबाट खेलेका थिए ।

एक समय ६७–६ को दयनीय अवस्थामा पुगेको जिम्बावेलाई बर्ल र ल्यूक जोंगवेले सातौं विकेटका लागि आक्रामक ७९ रनको साझेदारी गर्दै इनिङ उकासेका थिए । ल्यूक जाेंगवेले २० बलमा ४ चौका र २ छक्कासहित ३४ रन जोडे ।

ओपनर क्रेग इर्विन २७ बलमा २ चौका र १ छक्कासहित २४, रेजिस चकभा १७ र सिकन्दर राजा गोल्डेन डक आउट भए । बंगलादेशका मेहदी हसन र हसन मोहम्मदले दुई दुई विकेट लिए ।