एजेन्सी – अलराउन्डर सिकन्दर राजा र इनोसेन्ट कैयाको उत्कृष्ट शतकमा जिम्बावेले पहिलो ओडिआई खेलमा बंगलादेशलाई ५ विकेटले हराएको छ । योसँगै घरेलु टोली जिम्बावेले तीन ओडिआई खेलको सिरिजमा १–० को अग्रता लिएको छ ।

जितको लागि ३ सय ४ रनको विजयी लक्ष्य पछ्याएको जिम्बावेले ४८.२ ओभरमा ५ विकेट गुमाउँदै पूरा गर्यो । जिम्बावेको जितमा सिकन्दर राजा १ सय ९ बलमा ८ चौका र ६ छक्कासहित १ सय ३५ रनमा अविजित रहे । राजाको ओडिआई करिअरको चौथो शतक हो ।

इनोसेन्ट कैयाले १ सय २२ बलमा ११ चौका र २ छक्कासहित १ सय १० रनको शतकीय इनिङ खेले । उनको यो पहिलो अन्तर्राष्ट्रिय शतक हो ।

खराब सुरुवात गरेपनि चौथो विकेटका लागि राजा र कैयाले १ सय ९२ रनको सानदार शतकीय साझेदारीका साथ जितको आधार पक्का गराएका थिए । सुरुवाती दुई ओभरमा ६ रन जोड्दा जिम्बावेले दुई विकेट गुमाएको थियो ।

तेस्रो विकेटका लागि वेस्ली मेधर्वे र कैयाले ५६ रनको साझेदारी गरेका थिए । मेधर्वे १९ रनमा आउट भए । ल्यूक जाेंगवेले २४ रन बनाए । बंगलादेशका मुस्ताफिजुर रहमान, शोरिफुल इस्लाम, मेहदी हसन र मोद्दासेक हसनले एक एक विकेट लिए ।

त्यसअघि हरारे स्पोर्ट्स क्लबमा टस हारेर पहिला ब्याटिङ गर्दै निर्धारित ५० ओभरमा २ विकेट गुमाउँदै ३ सय ३ रन बनायो । बंगलादेशका लिटन दास ८९ बलमा ९ चौका र १ छक्कासहित ८१ रनमा रिटायर्ट हर्ट भए ।

ओपनर दास र कप्तान तमिम इकबालले पहिलो विकेटका लागि २५.४ ओभरमा १ सय १९ रनको शतकीय सुरुवात दिलाएका थिए । इकबालले ८८ बलमा ९ चौकासहित ६२ रन बनाए ।

अनमुल हक ६२ बलमा ६ चौका र ३ छक्कासहित ७३ रन बनाए । मुश्फिकुर रहिमले ४९ बलमा ५ चौकासहित ५२ रनमा अविजित रहे । महमुदूल्लाह रियाद १२ बलमा ३ चौकासहित २० रनमा अविजित रहे । जिम्बावेका भिक्टर न्याउची र राजाले एक एक विकेट लिए । दोस्रो खेल आइतबार हुनेछ ।