एजेन्सी – भारतले चौथो टि२० आई खेलमा वेस्टइन्डिजलाई १ सय ९२ रनको चुनौतीपूर्ण लक्ष्य दिएको छ । फ्लोरिडामा टस हारेर पहिला ब्याटिङको निम्तो पाएको भारतले निर्धारित २० ओभरमा ५ विकेट गुमाउँदै १ सय ९१ रन बनायो ।

भारतका सञ्जु स्यामसन २३ बलमा २ चौका र १ छक्कासहित ३० रनमा अविजित रहे । अक्षर पटेल ८ बलमा २ छक्का र १ चौकासहित २० रनमा अविजित रहे । विकेटकिपर ऋषभ पन्त ३१ बलमा ६ चौकासहित सर्वाधिक ४४ रनमा आउट भए ।
भारतलाई ओपनर रोहित शर्मा र सूर्यकुमार यादवले ४.४ ओभरमा ५३ रनको साझेदारी गर्दै राम्रो सुरुवात दिलाएका थिए ।

स्पिनर अकिल हुसैनले रोहितलाई १६ बलमा २ चौका र ३ छक्कासहित ३३ रनमा बोल्ड आउट गरे । अल्जारी जोशेफले सूर्यलाई २४ रनमा एलबीडब्लू आउट गरे । उनले १४ बलमा १ चौका र २ छक्का प्रहार गरे । दीपक हुडा १९ बलमा २ चौकासहित २१ रनमा आउट भए ।

अल्जारी जोशेफले ४ ओभरमा २९ रन खर्चेर २ विकेट लिए । ओबेद म्याकोयले ४ ओभरमा ६६ रन खर्चेर २ विकेट लिए । यो वेस्टइन्डिजबाट टि२० आईमा सबैभन्दा खराब प्रदर्शन हो । भारतसँग दोस्रो खेलमा ६ विकेट लिँदै म्यायकोय टि२० आईमा वेस्टइन्डिजबाट उत्कृष्ट प्रदर्शन गर्ने बलर समेत बनेका थिए ।

पाँच टि२० आई खेलको सिरिजमा भारत २-१ ले अघि छ ।