एजेन्सी – उपाधि दाबेदार भारतलाई अगष्ट अन्तिममा युएईमा हुने टि२० एसिया कप प्रतियोगितामा धक्का लागेको छ । बलिङका प्रमुख हतियार तीव्र गतिका बलर जस्प्रित बुमराहले एसिया कप गुमाउने भएका छन् ।

योर्कर र डेथ ओभरका उत्कृष्ट बलर बुमराह ब्याक इन्जुरीको कारण नहुँदा भारतको तीव्र गतिको बलिङ आक्रामक तुलनात्मक रुपमा कमजोर बनेको छ । यस अघिनै अर्का तीव्र गतिका बलर हर्षल पटेल छातीमा चोटका कारण एसिया कप गुमाएका छन् । हर्षलले टि२० विश्वकप पनि गुमाउने सम्भावना छ ।

चोटका कारण भारतले बुमराहलाई वेस्टइन्डिज भ्रमणमा विश्राम दिएको थियो । पछिल्लो पटक बुमराहले जुलाई १४ मा इंग्ल्यान्डविरुद्ध ओडिआई खेल खेलेका थिए । उनले तीन टि२० आई सिरिजमा एक खेल मात्र खेलेका थिए ।

एसिया कपमा भारतको तीव्र गतिको बलरको रुपमा अर्शदीप सिंह, आवेश खान र भुवनेश्वर कुमार छन् । हार्दिक पान्ड्या अलराउन्डरको रुपमा छन् । भारतले स्पिनरमा रविन्द्र जडेजा, रविचन्द्रन आश्विन, रवि विश्रोई र युजभेन्द्र चहललाई राखेको छ ।

एसिया कप २७ अगष्ट देखि ११ सेप्टेम्बर सम्म युएईमा हुनेछ । समूह ए मा पाकिस्तान, भारत र छनोट भएर आउने एक टोली हुनेछन् । छनोटमा युएई, कुवेत, हङकङ र सिंगापुर छन् । शीर्ष स्थानमा रहने टोलीले भारत र पाकिस्तानसँग खेल्न पाउने छन् ।

समूह बी मा अफगानिस्तान, बंगलादेश र श्रीलंका छन् । दुबै समूहका शीर्ष दुई दुई टोली सुपर फोरमा प्रतिस्पर्धा गर्नेछन् । भारत र पाकिस्तान प्रमुख उपाधिका दाबेदार टोली हुन् ।

एसिया कप खेल्ने भारतको टोली :

रोहित शर्मा (कप्तान), लोकेश राहुल (उपकप्तान), विराट कोहली, सूर्यकुमार यादव, ऋषभ पन्त (विकेटकिपर), दीपक हुडा, दीनेश कार्तिक (विकेटकिपर), हार्दिक पान्ड्या, रवि विश्रोई, रविचन्द्रन आश्विन, रविन्द्र जडेजा, युजभेन्द्र चहल, भुवनेश्वर कुमार, अर्शदीप सिंह र आवेश खान ।