एजेन्सी – आयरल्यान्डले अफगानिस्तानसँगको पहिलो टि२० आई खेलमा ७ विकेटको रोमान्चक जित हात पारेको छ । योसँगै पाँच टि२० आई खेलको सिरिजमा घरेलु टोली आयरल्यान्डले १-० को अग्रता लिएको छ । यस सिजनमा आयरल्यान्डले आफ्नो जित विहीन यात्रालाई पनि अन्त्य गरेको छ ।

जितको लागि १ सय ६९ रनको विजयी लक्ष्य पछ्याएको आयरल्यान्डले १९.५ ओभरमा ३ विकेट गुमाउँदै पूरा गर्यो । आयरल्यान्डलाई जितको लागि अन्तिम ६ बलमा १३ रन चाहिँएको थियो । तीव्र गतिका बलर नविन उल हकलाई ह्यारी टेक्टरले पहिलो बलमा दुई र दोस्रो बलमा चौका प्रहार गर्दै दबाबमा राखे ।

तेस्रो बलमा योर्करको कारण एक रन मात्र बटुल्न पाए । त्यसपछि जर्ज डोकरेलले लगातार दुई चौका प्रहार गर्दै खेल जिताए । चौथो बलमा भने फिल्डिङ मिसको कारण चौका जान पुगेको थियो ।

आयरल्यान्डका कप्तान एन्डी बालबर्नीले ३८ बलमा ५ चौका र १ छक्कासहित ५१ रनको इनिङ खेले । लोर्कन टकर ३६ बलमा ६ चौका र १ छक्कासहित ५० रनमा आउट भए । ओपनर पल स्टर्लिङ र बालबर्नीले पहिलो विकेटका लागि ६१ रनको साझेदारी गर्दै राम्रो सुरुवात दिए । दोस्रो विकेटका लागि बालबर्नी र टकरले ६२ रनको साझेदारी गर्दै जितको आधार तय गरेका थिए । स्टर्लिङ २९ बलमा ३ चौका र २ छक्कासहित ३१ रनमा आउट भए ।

ह्यारी टेक्टर १५ बलमा १ चौका र १ छक्कासहित २५ र डोकरेल १० रनमा अविजित रहे । अफगानिस्तानका मुजिब उर रहमान, मोहम्मद नावी र नविन उल हकले एक एक विकेट लिए । राशिद खानले ४ ओभरमा २५ रन खर्चेपनि विकेट लिन सकेनन् ।

त्यसअघि सिभिल सर्भिस क्रिकेट क्लबमा टस जितेर पहिला ब्याटिङ थालेको अफगानिस्तानले निर्धारित २० ओभरमा ७ विकेट गुमाउँदै १ सय ६८ रन बनायो ।

अफगानिस्तानका उस्मान घानी ४२ बलमा ५ चौका र २ छक्कासहित ५९ रनको अर्धशतकीय इनिङ खेले । ओपनर रहमानुउल्लाह गुरबाज २६ र ईब्राहिम जद्रान २९ रनमा आउट भए । आयरल्यान्डका ब्यारी म्याकार्थीले ४ ओभरमा ३४ रन खर्चेर तीन विकेट लिए । जर्ज डोकरेलले २ ओभरमा ७ रन खर्चेर दुई विकेट लिए । दोस्रो खेल बिहीबार हुनेछ ।