एजेन्सी – तीव्र गतिका बलर भुवनेश्वर कुमार र हार्दिक पान्ड्याको उत्कृष्ट बलिङमा पाकिस्तानले टि२० एसिया कप २०२२ मा भारतलाई १ सय ४८ रनको मध्यम लक्ष्य दिएको छ । दुबई इन्टरनेशल क्रिकेट स्टेडियममा टस हारेर पहिला ब्याटिङ थालेको पाकिस्तान १९.५ ओभरमा १ सय ४७ रनमा अल आउट भयो ।

पाकिस्तानका ओपनर मोहम्मद रिजवानले ४२ बलमा ४ चौका र १ छक्कासहित सर्वाधिक ४३ रन बनाए । ओपनर तथा कप्तान बाबर आजम तेस्रो ओभरमै आउट भएपछि पाकिस्तान सुरुवातमै दबाबमा परेको थियो । तीव्र गतिका बलर भुवनेश्वर कुमारको बाउन्सर बलमा एज लागेर बाबर आजम १० रनमा अर्शदीपसिंहबाट क्याच आउट भए ।

आवेश खानको छैटौं ओभरको पाँचौं बलमा फखार जमान १० रनमा विकेटकिपर दीनेश कार्तिकबाट क्याच आउट भए । फखार एज लागेर अम्पायरले आउट नदिँदै आफैं पेभिलिएनतर्फ लागेका थिए ।

तेस्रो विकेटका लागि इफ्तिखर अहमद र रिजवानले ४५ रनको साझेदारी गरेका थिए । हार्दिकको बलमा इफ्तिखर २८ रनमा कार्तिकबाट क्याच भए । उनले २२ बलमा २ चौका र १ छक्का प्रहार गरे ।

हार्दिकको १५ औं ओभरको पहिलो बलमा रिजवान थर्डम्यानमा आवेश खानबाट क्याच आउट भए । एक बलपछि खुशदील शाह दुई रनमा क्याच आउट भए ।

भुवनेश्वर कुमारले विष्फोटक ब्याटर आसिफ अलीलाई ९ रनमा सूर्यकुमार यादवबाट क्याच गराएपछि ठूलो इनिङको सम्भावना सकिएको थियो । तल्लोक्रमका शहनवाजले ६ बलमा २ छक्कासहित १६ रनमा आउट भए ।

भारतका भुवनेश्वर कुमारले ४ ओभरमा २६ रन खर्चेर ४ विकेट लिए । हार्दिक पान्ड्याले ४ ओभरमा २५ रन खर्चेर ३ विकेट लिए । अर्शदीपसिंहले ३.५ ओभरमा ३३ रन खर्चेर २ विकेट लिए । आवेश खानले एक विकेट लिए ।