एजेन्सी – उपाधिको दावेदार भारतले युएईमा जारी टि२० एसिया कप २०२२ को सुपर फोरमा लगातार दुई खेल हारेपछि फाइनल पुग्ने समिकरण अंक गणीतिय अर्थात झिनो आशा मात्र बाँकी राखेको छ ।

मंगलबार राती श्रीलंकासँग ६ विकेटले पराजित भएपछि भारतको फाइनल खेल्ने सम्भावना झिनो अंक गणीतिय मात्र बाँकी रहेको हो । भारतले प्रस्तुत गरेको १ सय ७४ रनको लक्ष्य श्रीलंकाले १९.५ ओभरमा ४ विकेट गुमाउँदै पूरा गर्दै फाइनल नजिक पुगेको छ । श्रीलंका फाइनलमा पुग्न औपचारिकता मात्र बाँकी छ ।

भारत सुपर फोरको पहिलो खेलमा पाकिस्तानसँग ५ विकेटले पराजित भएको थियो । भारतले सुपर फोरमा अव अफगानिस्तानसँग खेल्न बाँकी छ । पाकिस्तानले श्रीलंका र अफगानिस्तानसँग खेल्न बाँकी छ ।

बुधबार पाकिस्तानले अफगानिस्तानसँग खेल्नेछ । पाकिस्तान विजयी भएमा भारत अधिकारिक रुपमा सुपर फोरबाटै बाहिरनेछ । अफगानिस्तानले पाकिस्तानलाई हराएको खण्डमा भने झिनो अंक गणीतिय सम्भवाना बाँकी रहनेछ । तर भारतले शुक्रबार श्रीलंका र पाकिस्तानबीचको नतिजा पनि पर्खनु पर्छ । उक्त खेलमा पनि पाकिस्तानले हार्नै पर्ने हुन्छ ।

भारतको अन्तिम आशा अब दुई अंक र अन्य नतिजा आफ्नो अनुकुल आउनु मात्रै हो । यो अवस्थामा भारतले बिहीबार अफगानिस्तानमाथि फराकिलो जित हात पार्दै २ अंक जोड्नुपर्छ । तर बुधबार अफगानिस्तानको जितको कामना गर्नुपर्ने हुन्छ । पाकिस्तानले दुबै खेल हारेको खण्डमा तीन टोलीको समान २–२ अंक हुनेछ । २–२ अंकमा नेटरनरेटमा माथि रहँदै भारत फाइनल खेल्ने झिनो अंक गणीतिय आशामा छ ।

सोझो अर्थमा पाकिस्तानले दुवै खेलमा हारेको खण्डमा मात्र भारत फाइनलमा पुग्न सक्छ । अन्यथा एक खेलमा जित वा कुनै कारण खेल रद्द हुँदा पनि पाकिस्तान फाइनलमा पुग्ने सम्भावना उच्च छ । श्रीलंका भने ४ अंकका साथ फाइनलमा स्थान लगभग पक्कापक्की गराएको औपचारिकता बाँकी छ ।

तर उच्च लयमा रहेको पाकिस्तान दुवै खेलमा विजयी हुने सम्भावना उच्च छ । एसिया कपमा हङकङलाई ३८ रनमा अल आउट गर्दै सानदार जित हात पारेको थियो । सुपर फोरमा भारतमाथि सानदार जित हात पारेको थियो । भारतलाई हराउन पाकिस्तानले १ सय ८२ रनको लक्ष्य १९.५ ओभरमा ५ विकेट गुमाउँदै पूरा गरेको थियो । समूह चरणमा भने पाकिस्तान भारतसँग ५ विकेटले पराजित भएको थियो । बाबर आजमले कप्तानी सम्हालेपछि पाकिस्तानमा धेरै परिवर्तन भएको छ । युएई पाकिस्तानको घरेलु मैदान समेत हो ।