काठमाडौं (हाम्रो खेलकुद) – नेपाल क्रिकेट संघ (क्यान) ले नाबालिकालाई बलात्कार गरेको आरोप लागेका कप्तान सन्दीप लामिछानेलाई तत्काल कप्तानबाट नहटाउने भएको छ ।

बलात्कारको आरोप लागेपछि नैतिकताको आधारमा सन्दीपलाई तत्काल कप्ताानबाट हटाउन सक्ने चर्चा चलेको थियो । तर क्यानका अध्यक्ष चतुरबहादुर चन्दले सन्दीपलाई तत्काल जिम्मेवारीबाट नहटाउने जनाएका छन् ।

‘अहिले छलफल केहि भएको छैन । यो कानुनी कुरा हो । हामीले छलफल गर्यौ भन्दा पनि कानुनले जे भन्छ हामी त्यहिँ अनुसार सहयोग गर्ने हो । तत्काल कप्तानबाट हटाउनु पर्दैन’, चन्दले हाम्रो खेलकुदसँग भने ।

त्यसैमा उनले थपे, ‘अब एक महिना नेपालको खेल नै छैन । तत्काल कप्तान हुनु र नहुनुमा कुनै अर्थ राख्दैन । सम्बन्धित निकायले कारबाही गर भन्यो भनी मात्र गर्ने हो । हामीले मिडियाबाटनै थाहा पाएको हो । अनुसन्धान निकायले केहि भन्यो भने अर्को निर्णय आउला ।’

‘कप्तान भएर र नभएर फरक पर्ने केहि छैन । किनभने नेपालको एक महिना कुनैपनि खेल छैन । एउटा सामान्य व्यक्ति भनेर उनलाई मुद्दा लागेको हो । क्रिकेटको कप्तान भनेर मुद्दा लागेको होईन । तत्काल कप्तानबाट हटाउदैनौं । अनुसन्धानको निर्णयपछि सहयोग माग्यो भने कानुन बमोजिम हामी कारबाही गर्छौ’, चन्दले भने ।

सन्दीप र पीडित किशोरी काठमाडौंको होटलमा करिब सात घन्टा बसेको खुलेको छ । सन्दीप र किशोरी भदौ ५ गते ११:५५ बजे मा होटल पसेको देखिएको छ । प्रहरीले काठमाडौं–९ सिनामंगलस्थित उनीहरू बसेको होटलको सिसिटिभी फुटेज पनि संकलन गरेको बताइएको छ ।

मंगलबार प्रहरी वृत्त गौशालामा जाहेरी परेसँगै प्रहरीले प्रमाणहरू संकलन गर्न थालेको जनाएको छ । प्रहरीले उनीहरू कोठा नम्बर ३०५ मा बसेको बताएको छ । होटलमा करिब ७ घन्टा बसेर भदौ ६ गते बिहान ६:४६ मा उनीहरु होटलबाट फकिएको फुटबजमा देखिएको बताइएको छ ।

सन्दीपले सेतो क्याप, सेतो जुत्ता, निलो रंगको टिसर्ट तथा किशोरीले सेतो ज्याकेट, पहेलो टिसर्ट र कालो जिन्स लगाएकी फुटेजमा देखिएको बताइएको छ ।

सन्दीपले आफूमाथि मध्यरात पटक–पटक बलात्कार गरेको प्रहरीलाई बताएकी छन् । प्रहरीले मंगलबार नै किशोरीको स्वास्थ्य परीक्षणसमेत गराएको बताइएको छ । प्रमाणहरू संकलन गरी लामिछानेविरूद्ध काठमाडौं जिल्ला अदालतबाट बुधबार नै पक्राउ पुर्जी जारी गर्ने प्रहरीको तयारी रहेको बताइएको छ ।

नेपाली क्रिकेट टोली भदौ ६ गते मा केन्या प्रस्थान गरेको थियो । उक्त समयमा सन्दीप सहित ११ खेलाडी केन्या गएका थिए । केन्यासँगको पाँच टि२० आई सिरिज नेपालले ३–२ ले जितेको थियो । कप्तान सन्दीप टि२० आई सिरिजमा प्लेयर अफ द सिरिज चुनिएका थिए ।

सन्दीपले केन्यासँगको तीन एकदिवसिय अभ्यास खेल भने खेलेका थिएनन् । क्यारेवियन प्रिमियर लिग (सिपिएल) खेल्न वेस्टइन्जि गएपछि तीन एकदिवसिय अभ्यास खेल गुमाएका थिए । रोहित पौडेलको कप्तानीमा नेपालले उक्त सिरिज क्लिनस्विप गरेको थियो । सिपिएलमा सन्दीप जमैका तलवाजको टोलीमा छन् । तर यता बलात्कारको आरोप लागेपछि उनी नेपाल फर्किने सम्भावना छ । सन्दीपबाहेकको टोली बुधबार स्वदेश आइसकेको छ ।