काठमाडौं (हाम्रो खेलकुद) – मध्यक्रमका ब्याटर आरिफ शेखको आक्रामक ब्याटिङमा नेपाल पुलिस क्लबले नवौं राष्ट्रिय खेलकुद अन्तर्गत क्रिकेट प्रतियोगिता दोस्रो सेमिफाइनलमा एनआरएनए स्पोर्ट्स एकेडेमीलाई १ सय ११ रनको विशाल लक्ष्य दिएको छ ।

टियु क्रिकेट मैदानमा टस जितेर पहिला ब्याटिङ थालेको पुलिसले निर्धारित ८ ओभरमा ६ विकेट गुमाउँदै १ सय १० रन बनायो । पुलिसका आरिफ शेखले १५ बलमा ३ चौका र ३ छक्कासहित सर्वाधिक ३६ रनको योगदान दिए ।

तीव्र गतिका बलर दीपक क्षेत्रीको पहिलो ओभरको पाँचौं बलमा ओपनर कुशल भुर्तेल कभरमा दिवास गिरीबाट १२ रनमा क्याच आउट भए । त्यसअघि कुशलले दुई छक्का हानेका थिए ।

दोस्रो ओभरको पहिलो बलमा ओपनर सुनिल धमलाले गिरीलाई उत्कृष्ट छक्का हाने । तर दोस्रो बलमा चोभारतर्फको लङअनमा ६ रनमा क्याच आउट भए ।

कप्तान सुनाम गौतमको बलमा दीपेन्द्र काउकर्नरमा २५ रनमा क्याच आउट भए । दीपेन्द्रले १२ बलमा २ चौका र १ छक्का हाने । करण केसी ७ बलमा २ छक्कासहित १८ रनमा आउट भए । गुलशन झा ७ रनमा अविजित रहे ।

एनआरएनएका दिवास गिरीले २ ओभरमा २८ रन खर्चेर २ विकेट लिए । दीनेश खरेलले १ ओभरमा १५ रन खर्चेर १ विकेट लिए । दीपक क्षेत्री र सुनाम गौतमले एक एक विकेट लिए । यस खेलको विजेताले फाइनलमा त्रिभुवन आर्मी क्लबसँग खेल्नेछ ।