एजेन्सी – आयरल्यान्ड महिला क्रिकेट टोलीले युएईमा जारी आइसिसी वुमन्स टि२० विश्वकप छनोटको पहिलो सेमिफाइनलमा जिम्बावेलाई ४ रनले हराउँदै आगमी वर्ष दक्षिण अफ्रिकामा हुने विश्वकपमा स्थान बनाएको छ । रोमान्चक जितका साथ फाइनलमा पुग्दै आयरल्यान्डले चौथो पटक महिला टि२० विश्वकपमा स्थान पक्का गरेको हो ।

जितको लागि १ सय ३८ रनको विजयी लक्ष्य पछ्याएको जिम्बावेले निर्धारित २० ओभरमा ६ विकेट गुमाउँदै १ सय ३३ रन बनायो । जिम्बावेकी ओपनर शार्न मेयर्सले ३६ बलमा ५ चौकासहित सर्वाधिक ३९ रन बनाइन् ।

कप्तान मेरी एन मुसोन्डाले २९ बलमा ३ चौकासहित ३१ र जोसेफिएन एनकोमोले १८ रन बनाइन् । जिम्बावेकी नोमवेलो सिबांडा र केलिस न्द्लोवसले दुई दुई विकेट लिइन् ।

जिम्बावेलाई अन्तिम ६ बलमा १५ रन चाहिँएको थियो । आयरल्यान्डकी कप्तान लौरा डेलानीले १० रन खर्चेर विश्वकपमा स्थान पक्का गरिन् । आयरल्यान्डकी जेन मागुइरे र अर्नेल केलीले दुई दुई विकेट लिए ।

त्यसअघि शेख जायद स्टेडियम आबूधाबीमा टस हारेर पहिला ब्याटिङ थालेको आयरल्यान्डले निर्धारित २० ओभरमा ६ विकेट गुमाउँदै १ सय ३७ रन बनाएको थियो । आयरल्यान्डकी ओर्ला प्रेंडरगास्टले २५ बलमा ३ चौका र १ छक्कासहित सर्वाधिक २८ रन बनाइन् ।

ओपनर एमी हन्टर १९,जेमि लेविस ११, कप्तान लौरा डेलानी २२ र रेबेका स्टोकेलले २६ रन बनाई । दोस्रो सेमिफाइनलमा थाईल्यान्ड र बंगलादेशबीच प्रतिस्पर्धा हुँदैछ । विजेता टोली विश्वकपमा पुग्नेछ । फाइनल खेल भने आइतबार हुनेछ ।

आयरल्यान्ड चौथो पटक महिला टि२० विश्वकपमा पुगेको हो । यसअघि आयरल्यान्डले २०१४, २०१६ र २०१८ को महिला टि२० विश्वकप खेलेको थियो ।