एजेन्सी – ओपनर डेविड वार्नरसहित प्रमुख चार स्टार खेलाडी अष्ट्रेलिया टोलीमा फर्किएका छन् । वेस्टइन्डिजसँग घरेलु मैदानमा हुने दुई टि२० आई खेलको लागि वार्नर, मिचेल मार्श, अलराउन्डर मार्कस स्टोइनिस र तीव्र गतिका बलर मिचेल स्टार्क टोलीमा फर्किएका हुन् ।

गतवर्ष अष्ट्रेलिया टि२० विश्वकप जिताउन सानदार प्रदर्शन गरेका प्रमुख चार खेलाडी फर्किएका हुन् । यी चार खेलाडी भारतसँगको तीन टि२० आई खेलमा थिएनन् । अष्ट्रेलियाले डेविड वार्नरलाई तीन सातापछि घरेलु मैदानमा हुने टि२० विश्वकप अघि विश्राम दिएको थियो । उनको स्थानमा अलराउन्डर क्यामरन ग्रीनलाई मौका दिएको थियो ।

पहिलो खेलमा भारतलाई ४ विकेटले हराउन ग्रीनले ६१ रनको उत्कृष्ट इनिङ खेलेका थिए । तेस्रो खेलमा ग्रीनलेनै १९ बलमा अर्धशतक हानेका थिए । अष्ट्रेलियाले ग्रीनलाई टि२० विश्वकप टोलीमा राखेको छैन । तर टोली फेरबदल गर्न मिल्ने हुँदा उनी पर्ने अनुमान गरिएको छ । मार्श, स्टोइनिस र स्टार्क भने चोटका कारण भारत भ्रमणमा थिएनन् ।

तीव्र गतिका बलर केन रिचर्ड्सन र एश्टन अगर भने वेस्टइन्डिज भ्रमणमा छैनन् । टिम डेविड, ग्लेन म्याक्सवेल, म्याथ्यु वेड, ग्रीन, वार्नर, स्टोइनिस जस्ता हिटर हुँदा अष्ट्रेलियाको टोली निकै मजबुत बनेको छ । वेस्टइन्डिज र अष्ट्रेलियाबीच दुई टि२० आई खेल आगमी अक्टोबर ५ मा मिट्रक स्टेडियम र ७ अक्टोबरमा द गाब्बा ब्रिसबेनमा हुनेछ ।

अष्ट्रेलिया टोली :

आरोन फिन्च (कप्तान), शेन एबोट, प्याट कमिन्स, टिम डेविड, क्यामरन ग्रीन, जोश हेजलवुड, जोश इंग्लिस, मिचेल मार्श, ग्लेन म्याक्सवेल, ड्यानिल साम्स, स्टिभ स्मिथ, मिचेल स्टार्क, मार्कस स्टोइनिस, म्याथ्यु वेड, डेविड वार्नर र एडम जाम्पा ।