काठमाडौं (हाम्रो खेलकुद) – नाबालिग बलत्कारको आरोप लागेका राष्ट्रिय क्रिकेट टोलीका पूर्व कप्तान सन्दीप लामिछाने अर्को साता स्वदेश फर्कर आत्मसमर्पण गर्ने जनाएका छन् ।

सन्दीपले शनिबार सामाजिक सञ्जालमा दशैको टिकाको भोली पल्ट असोज २० गते स्वदेश फर्कने जानकारी दिएका छन्। आफू निर्दोष रहेको दाबी गर्दै आएका सन्दीपले कानुनी लडाई लड्ने दोहोराएका छन् । उनले भनेका छन्, ‘नेपालको आधिकारिक निकायमा आफूलाई सम्पर्ण गरि आफूविरुद्ध लागेको जोहरीकाविरुद्धमा कानुनी लडाई लड्नेछु ।’

अनेक अडकलबाजीका बीचमा सन्दीपले असोज ९ गते सामाजिक सन्जालमार्फत आफूविरुद्ध जाहेरी र पक्राउ पूर्जी जारी भएको समाचारले मानसिक रुपमा विछिप्त भएको बताएका थिए । भदौ २१ गते एक नाबालिगले सन्दीपले आफूलाई बलत्कार गरेको भन्दै किटानी जाहेरी दिएकी थिइन् । त्यसको केहि दिनमा काठमाडौं जिल्ला अदालतले सन्दीपविरुद्ध पक्राउ पुर्जी जारी गरेको थियो । नेपाल प्रहरीले भने गत साता उनीविरुद्ध डिफ्युज नोटिस जारी गरेको थियो ।

आफूविरुद्ध किटानी जाहेरी परेको जानकारी पाएपछि सन्दीपले सामाजिक सन्जालमार्फत आफू निर्दोष रहेको र कानुनी लडाइ लड्ने जनाएका थिए । उनले केहि दिनमै स्वदेश फर्कने पनि जनाएका थिए । त्यसयता सन्दीप कहाँ छन् भन्ने विषयमा विभिन्न अड्कलबाजी गरिदै आएको छ ।

राष्ट्रिय क्रिकेट टोलीका साथ सन्दीप भदौ ६ गते केन्या गएका थिए । उनी त्यहिबाट व्यवासायिक क्रिकेट खेल्नका लागि वेस्ट इन्डिज पुगेका थिए । केन्या जानु अघिल्लो दिन भदौ ५ गते आफूलाई बलत्कार गरेको भन्दै किटानी जाहेरी दिएकी थिइन् ।