एजेन्सी – कप्तान रस टेलर र एशले नर्सको विष्फोटक ब्याटिङमा इन्डिया क्यापिटल्सले विशाल लक्ष्य पूरा गर्दै लेजेन्ड्स क्रिकेट लिगको फाइनलमा पुगेको छ ।

आइतबार राती क्वालिफायर खेलमा भिलवारा किंग्सलाई ४ विकेटले हराउँदै इन्डिया क्यापिटल्स फाइनलमा पुगेको हो । जितको लागि २ सय २७ रनको विशाल लक्ष्य पछ्याएको क्यापिटल्सले १९.३ ओभरमा ६ विकेट गुमाउँदै पूरा गर्यो ।

कप्तान रस टेलरले ३९ बलमा ९ चौका र ५ छक्कासहित ८४ रनको सानदार इनिङ खेले । एशले नर्सले २८ बलमा ५ चौका र ४ छक्कासहित ६० रनमा अविजित रहे । टेलरले २० र नर्सले २७ बलमा अर्धशतक पूरा गरेका थिए ।

लियाम प्लंकेटले ९ बलमा १ चौका र २ छक्कासहित महत्वपूर्ण २० रन बनाए । किंग्सका फिडेल एडवार्ड्सले सर्वाधिक दुई विकेट लिए ।

त्यसअघि जोधपुरमा टस जितेर पहिला ब्याटिङ रोजेको किंग्सले निर्धारित २० ओभरमा ५ विकेट गुमाउँदै २ सय २६ रन बनायो । किंग्सका शेन वाटसनले ३९ बलमा १० चौका र २ छक्कासहित सर्वाधिक ६५ रनको योगदान दिए ।

ओपनर विलियम पोर्टरफिल्डले ३७ बलमा ७ चौका र ३ छक्कासहित ५९ रन जोड्दै उत्कृष्ट सुरुवात दिलाएका थिए । युसुफ पठानले विष्फोटक अन्त्य गरे । पठानले २४ बलमा ३ चौका र ४ छक्कासहित ४८ रन जोडे । राजेश विश्रोई ११ बलमा ५ चौका र २ छक्कासहित ३६ रनमा अविजित रहे । इरफान पठान ८ रनमा आउट भए ।

ओपनर मार्ने भानलाई ४ रनमै पहिलो ओभरमा गुुमाएको थियो । दोस्रो विकेटका लागि शेन वाटसन र विलियम पोर्टरफिल्ड १ सय १६ रनको उत्कृष्ट शतकीय साझेदारी गर्दै विशाल योगफलको आधार तय गरे ।

इन्डिया क्यापिटल्सका मिचेल जोनसनले ४ ओभरमा ५१ रन खर्चेर दुई विकेट लिए । फाइनल बुधबार हुनेछ । एलिमिनेटर खेलमा फाइनलमा स्थान बनाउन किंग्स र गुजरात जायन्ट्सबीच आज राती प्रतिस्पर्धा हुनेछ ।