काठमाडौं (हाम्रो खेलकुद) – नेपाल क्रिकेट संघ (क्यान) ले १६ लाख रुपैयाँ खर्च गरेर क्रिकेट टोली चड्ने बस मर्मत गरेको छ । पुरानो बसलाई नै मर्मत गर्दै क्यानले आधुनिक सुविधा थपेको छ । त्यसको लागि १६ लाख रुपैयाँ खर्च गरेको छ ।

‘यो बस पुरानो हो । यसको पाटपुर्जा परिवर्तन गरेको हो । अहिलेको खेलाडीलाई सुविधा सम्पन्न बस बनाएका हौं । यसको खर्च १६ लाख रुपैयाँ छ’, क्यानका कोषाध्यक्ष रोशनसिंहले हाम्रो खेलकुदसँग भने । क्यानले पुरानै बसको इन्जिन बाहेक अन्य सबै परिवर्तन गरेको छ ।

यो बस क्यानलाई भारतीय दुताबासले ११ वर्षअघि अनुदानमा दिएको थियो । ‘बोडी (पाटपुर्जा) कामै नलाग्ने भएको थियो । क्यानले आफैं खर्चमा बनाएका हौं । हामीले खर्च गरेर बनाएको रकममा अर्को बस पनि आउथ्यो । तर अहिलेको जस्तो बन्ने थिएन । यसमा साउन्ड स्टिम, कुलर, माइक स्टम, टिभी, वाइफाई, आधुनिक सिट लगायतका सेवा सुविधा छन्’, रोशनले भने ।

उक्त बसलाई बनेपा बनाएर क्यानले सोमबार काठमाडौंमा सञ्चालनको लागि लिएको छ । पहेलो रङमा डिजाइन गरेको बसमा नेपालको झण्डा, ब्याट, क्यानको लोगो, भारत र नेपालको झण्डा राखिएको छ । भारतीय दुतावासले अनुदानको रुपमा दिएको हुँदा भारत झण्डा राखेको छ ।

तत्काल नेपाली क्रिकेट टोलीको अन्तर्राष्ट्रिय खेल भने छैन । नेपालले आइसिसी विश्वकप लिग-२ त्रिकोणात्मक सिरिजको लागि नोभेम्बरमा नामिबिया भ्रमण गर्नेछ । त्यसअघि घरेलु मैदानमा नेपालले सिरिज गराउन प्रयास गरेको छ ।

बंगलादेश ए लाई तीन एकदिवसिय अभ्यास खेल खेल्न प्रस्ताव समेत गरेको थियो । तत्काल भने खेल्न इच्छुक नभएको बुझिएको छ । कार्तिक दोस्रो सातादेखि काठमाडौंमा प्रधानमन्त्री कप एकदिवसिय क्रिकेट प्रतियोगिता हुँदैछ ।