एजेन्सी– शीर्षक्रमका ब्याटर राइली रोसेउको विष्फोटक शतकमा दक्षिण अफ्रिकाले तेस्रो टि२० आई खेलमा घरेलु टोली भारतलाई २ सय २८ रनको विशाल लक्ष्य दिएको छ ।

इन्डोरमा टस हारेर पहिला ब्याटिङ थालेको दक्षिण अफ्रिकाले निर्धारित २० ओभरमा ३ विकेट गुमाउँदै २ सय २७ रन बनायो । दक्षिण अफ्रिकाका राइली रोसोउ ४८ बलमा ७ चौका र ८ छक्कासहित १ सय रनको अविजित विष्फोटक शतकीय इनिङ खेले । उनको यो टि२० आई करिअरको पहिलो शतक हो । उनले ४८ बलमा शतक पूरा गरेका थिए ।

२०१६ पछि यसै वर्ष टोलीमा फर्किएका रोसोउले सुरुवाती दुई खेलमा भने डक आउट भएका थिए । गत जुलाईमा इंग्ल्यान्डविरुद्ध ९६ रनको इनिङ खेलेका थिए । जुन करिअरको उच्च प्रदर्शन थियो । यता कप्तान टेम्बा बभुमा तीन रनमा आउट भए । सुरुवाती दुई खेलमा बभुमा एक र डक आउट भएका थिए । दोस्रो विकेटका लागि क्विन्टन डि कक र रोसोउले ९० रनको सानदार साझेदारी गरे ।

डि कक ४३ बलमा ६ चौका र ४ छक्कासहित ६८ रनमा रन आउट भए । दुई रन लिनेक्रममा डिककलाई श्रेएस ऐरको थ्रोमा विकेटकिपर ऋषभ पन्तले रन आउट गराए ।

त्यसपछि ब्याटिङमा आएका ट्रिस्टन स्टब्सले १८ बलमा २ चौका र १ छक्कासहित २३ रन जोडे । तेस्रो विकेटका लागि रोसोउ र स्टब्सले ४४ बलमा ८७ रनको साझेदारी गरेका थिए । दोस्रो खेलमा शतक हानेमा डेविड मिलरले विष्फोटक अन्त्य गरे । मिलर ५ बलमा ३ छक्कासहित १९ रनमा अविजित रहे । अन्तिम ओभरमा मिलरले दीपक चाहरलाई लगातार तीन छक्का हानेका थिए ।

भारतका दीपक चाहरले ४ ओभरमा ४८ रन खर्चेर १ विकेट लिए । उमेश यादवले ३ ओभरमा ३४ रन खर्चेर १ विकेट लिए । तीन टि२० आई खेलको सिरिज भारतले २(० को अग्रता लिँदै जितेको छ । दक्षिण अफ्रिका पहिलो खेलमा ८ विकेट र दोस्रो खेलमा १६ रनले पराजित भएको थियो ।