एजेन्सी – आइसिसी विश्वकप क्वालिफायर प्लेअफमा आज दुई खेल हुँदैछन् । घरेलु टोली नामिबियाले क्यानडासँग खेल्दैछ । जर्सीले अमेरिकासँग खेल्दैछ । दुबै खेल नेपाली समय अनुसार दिउँसो १ : १५ मा विन्डहोकमा सुरु हुनेछन् । क्यानडा ३ खेलमा २ मा जित र १ मा हारहित ४ अंकका साथ तेस्रो स्थानमा छ ।

नामिबिया ४ खेलमा २ मा जित र २ मा हारसहित ४ अंकका साथ चौथो स्थानमा छ । शीर्ष दुईमा रहेर आगमी जुन जुलाईमा जिम्बावेमा हुने विश्वकप छनोटमा पुग्न नामिबियाले पहिला क्यानडामाथि विशाल जित हात पार्नुपर्ने हुन्छ । त्यस्तै अमेरिका र युएई मध्य एक टोली अन्तिम खेलमा हार्नुपर्छ । अमेरिका र युएई दुबैले अन्तिम खेल जर्सीसँग खेल्न बाँकी छ ।

उता क्यानडालाई विश्वकप छनोटमा पुग्न बाँकी दुबै खेल जित्नुपर्ने हुन्छ । अन्तिम खेल क्यानडाले बुधबार पपुवा न्युगिनीसँग खेल्नेछ । पपुवा न्युगिनीलाई हराएमा ओडिआई मान्यता पनि पक्का हुनेछ । नामिबियाका कप्तान जेरार्ड इरास्मस र माइकल भान लिंगेन प्रमुख ब्याटर हुन् । यी दुई चलेको खण्डमा सहज जित हात पार्न सक्छ ।

निकोलस डेविन, जेन ग्रिन र जान निकोल लोफ्टीबाट आजको खेलमा उत्कृष्ट प्रदर्शन चाहन्छ । रुबेन ट्रम्पलम्यान प्रमुख बलर हुन् । क्यानडाका पर्गत सिंहले युएईविरुद्ध शतक हानेका थिए । पर्गत, म्याथ्यु स्पोर्स, निकोलस किर्टन र विजयरत्ने श्रीमन्था प्रमुख ब्याटर हुन् । कलिम साना र साद बिन जाफर प्रमुख बलर हुन् । यता अर्को खेलमा अमेरिकाले जर्सीसँग खेल्नेछ ।

अमेरिका विजयी हुँदा विश्वकप छनोट पक्कापक्की हुनेछ । तर औपचारिकता भने पर्खनुपर्ने हुन्छ । अमेरिका ४ खेलमा ३ मा जित र १ मा हारसहित ८ अंकका साथ शीर्ष स्थानमाछ । अमेरिका क्यानडासँग पराजित भएको थियो । नामिबिया, युएई र पपुवा न्युगिनीलाई हराउँदै विश्वकप छनोटको सम्भावना बलियो बनाएकोछ ।

आजको खेलमा क्यानडा नामिबियासँग पराजित भएमा र यस खेलमा अमेरिका विजयी भएमा सोझै विश्वकप छनोटमा पुग्नेछ । क्यानडा विजयी भएमा नेटरनरेट पर्खनुपर्ने हुन्छ । अमेरिका स्टिभ टेलर, साइतेजा मुक्कामल्ला र मोनांक पटेल प्रमुख ब्याटर हुन् । अली खान प्रमुख बलर हुन् ।

उता जर्सीको विश्वकप छनोटमा पुग्ने सम्भावना झिनो अंक गणीतिय छ । जर्सीले अमेरिका र युएई दुबैलाई विशाल अन्तरले पराजित गरेमा नेटरनरेटमा माथि रहँदै विश्वकप छनोटमा पुग्न सक्छ ।

पपुवा न्युगिनीलाई हराउन जर्सीका जोश लरेन्सन १ सय १४ र अशा ट्राइबले १ सय १५ रनको सानदार शतकीय इनिङ खेलेका थिए । यी दुई ब्याटर अमेरिकालाई स्तब्ध गराउन सक्छन् । त्यस्तै निक ग्रीनवुड र जोन्टी जेनर पनि घातक बन्नसक्ने ब्याटर हुन् । इंग्ल्यान्ड र न्युजिल्यान्डका मुलका खेलाडी हुँदा अप्रत्याशित नजिता हात पार्नसक्छ ।

प्रतियोगितामा नामिबिया, अमेरिका, जर्सी, क्यानडा, पपुवा न्युगिनी र युएई छन् । शीर्ष दुई टोलीले आगमी जुन जुलाईमा जिम्बावेमा हुने विश्वकप छनोट खेल्न पाउनेछन् । पपुवा न्युगिनी लगातार चार हारको साथ विश्वकप दौडबाट बाहिरि सकेको छ । विश्वकप छनोटमा लिग २ मा शीर्ष तीन टोली नेपाल, ओमान र स्कटल्यान्डसँगै सुपर लिगका पुछारका पाँच र प्लेअफका शीर्ष दुई टोली गरि कुल १० टोली हुनेछन् ।

१० टोलीलाई दुई समूहमा विभाजन गरिनेछ । सुपर सिक्स हुँदै शीर्ष दुई टोलीले आगमी अक्टोबर नोभेम्बरमा भारतमा हुने विश्वकप खेल्न पाउनेछन् । त्यस्तै यस प्लेअफ प्रतियोगिताबाट जर्सी, क्यानडा, युएई र पपुवा न्युगिनी मध्य दुई टोलीले ओडिआई मान्यता पाउनेछन् । यी चार टोलीबीचको प्रतिस्पर्धाबाट शीर्ष दुई स्थानमा रहने टोलीले ओडिआई मन्यता पाउनेन् ।