काठमाडौँं (हाम्रो खेलकुद) – स्वर्गीग रिचा श्रेष्ठको स्मृतिमा पूर्वाञ्चल क्रिकेट एकेडेमीको नाममा विराटनगरमा इन्डो–नेपाल टि–२० क्रिकेट प्रतियोगिता हुने भएको छ । लिग कम नकआउट नियममा हुने प्रतियोगिता चैत २७ देखि वैशाख ३ गतेसम्म सञ्चालन हुने भएको छ ।

नेपाल क्रिकेट संघ (क्यान) उपाध्यक्ष हुँदै तीन दशकसम्म केन्द्रीय रहेका नरेश श्रेष्ठ हाल उनी वरिष्ठ सल्लाहकार हुन् । नरेश श्रेष्ठ परिवारकी एक मात्र छोरी रिचाको ब्लड क्यान्सरका कारण दुई वर्षअघि अष्ट्रेलियामा मृत्यु भएको थियो । उनकै नाममा परिवारले करिब ३० लाखको लागतमा प्रतियोगिता आयोजना गर्न लागेको जनाएको छ ।

प्रतियोगितामा नेपालका तीन विभागीय टोली त्रिभुवन आर्मी क्लब, नेपाल पुलिस क्लब र नेपाल एपिएफ क्लबसहित नेपाल र भारतका खेलाडी मिलाएर बनाएको एनबीएससी क्रिकेट टिम, विराटनगरको वाईआरसीसी, सुदूरपश्चिको डडेलधुरा लगायत भारतको दिल्ली र बिहारको नरपथगन्ज क्रिकेट क्लबको सहभागिता रहनेछ ।

प्रतियोगिताका विजेताले १ लाख ५० हजार र उपविजेताले ७५ हजार नगद पुरस्कारसहित ट्रफी पाउने आयोजकले बताएको छ । त्यसैगरी म्यान अफ द सिरिजले ५० हजार मूल्य बराबरको क्रिकेट किट पाउनेछ । प्रतियोगिता सञ्चालन हुने खेल मैदान विराटनगर जुट मिलको उद्घाटन खेल त्रिभुवन आर्मी र बिहारको नरपथगन्ज क्रिकेट टिमबीच हुने खेल तालिका छ । यो प्रतियोगितालाई हरके वर्ष निरन्तरता दिइने श्रेष्ठले बताएका छन् ।

यस प्रतियोगिता गत वर्ष हुने भनिएपनि कोरोना कारण स्थगित भएको थियो । अष्ट्रेलियामा रिचा स्मृति क्रिकेट प्रतियोगिता हुँदै आएको छ । उक्त प्रतियोगिता अष्ट्रेलियामा हरेक वर्ष आयोजना हुने गर्दछ ।