काठमाडौं (हाम्रो खेलकुद) – मलेसियाका कप्तान अहमद फैजले एसिसी प्रिमियर कपको पहिलो खेलमा घरेलु टोली नेपालविरुद्ध अर्धशतक प्रहार गरेका छन् । टियु क्रिकेट मैदानमा टस जितेर पहिला ब्याटिङ रोजेको मलेसियाले २५ ओभरमा १ विकेट गुमाउँदै १ सय ३ रन बनाएको छ ।

मलेसियाका विरनदीप सिंह ६२ बलमा २ चौकासहित ३० रनमा क्रिजमा छन् । संयमित सुरुवात गर्नेक्रममा विरनदीप सिंहले ४९ बलमा पहिलो ब्यक्तिगत चौका प्रहार गरेका थिए । कप्तान अहमद फैज ७० बलमा ७ चौकासहित ५२ रनमा क्रिजमा छन् ।

दोस्रो विकेटका लागि विरनदीप र फैज अहमदले ८१ रनको साझेदारी गर्दै मलेसियालाई राम्रो अवस्थामा राखेका छन् । मलेसियालाई ओपनर मोहम्मद आमिर र विरनदीप सिंहले ५.५ ओभरमा २२ रनको साझेदारी गरेका थिए ।

गुलशन झाको बलमा कभरमा सट खेल्ने धुनमा आमिर १७ रनमा दीपेन्द्रसिंह ऐरीबाट सहज क्याच आउट भएका थिए । उनले १८ बलमा ३ चौका प्रहार गरे । नेपालले आजको खेलमा अनुभवी ब्याटर ज्ञानेन्द्र मल्ल, करण केसी र प्रतिश जि.सीलाई बेन्चमा राखेको छ ।

नेपालको प्लेइङ ११ :

रोहित पौडेल (कप्तान), कुशल भुर्तेल, आसिफ शेख, कुशल मल्ल, आरिफ शेख, सोमपाल कामी, दीपेन्द्रसिंह ऐरी, गुलशन झा, सन्दीप लामिछाने, भीम सार्की र ललित राजवंशी ।