एजेन्सी – युनाइटेड अरव इमिरेट्स (युएई) का युवा ब्याटर वृत्य अरविन्दले एसिसी प्रिमियर कपमा कुवेतविरुद्ध सानदार शतक हानेका छन् । टियु क्रिकेट मैदानमा टस हारेर पहिला ब्याटिङको निम्तो पाएको युएईले ३९ ओभरमा ३ विकेट गुमाउँदै १ सय ९० रन बनाएको छ ।

वृत्य अरविन्द १ सय १८ बलमा ७ चौका र ३ छक्कासहित १ सय रनमा क्रिजमा छन् । उनले ३९ औं ओभरको अन्तिम बलमा मिडअफमा एक रन प्रहार गर्दै १ सय १८ बलमा शतक पूरा गरेका थिए ।

अनुभवी ब्याटर रोहन मुस्तफा ९९ बलमा ५ चौकासहित ६२ रनमा क्रिजमा अविजित छन् । मुस्तफाले ९५ बलमा अर्धशतक पूरा गरेका थिए । एक समय २४–३ को खराब सुरुवात गरेको युएईलाई चौथो विकेटका लागि मुस्तफा र वृत्यले १ सय ६६ रनको अविजित शतकीय साझेदारीका साथ विशाल योगफलको आधार तय गरेका छन् ।

युएईको सुरुवात भने सम्झन लायक थिएन । कप्तान मोहम्मद वासिम पहिलो ओभरको चौथो बलमै ८ रनमा क्याच आउट भएका थिए । तीव्र गतिका बलर शाहरुख कुद्दुसको बलमा वासिम फस्ट स्लिपमा मिट भावसारबाट क्याच आउट भए । उनले ४ बलमा २ चौका प्रहार गरे ।

स्पिनर यासिन पटेलले दोस्रो ओभरको दोस्रो बलमा अर्का ओपनर आर्यन लाक्रालाई शून्यमा बोल्ड आउट गरे । शाहरुखले पाँचौं ओभरको चौथो बलमा अनुभवी ब्याटर रमिज शाहजादलाई ९ रनमा क्याच गराए । शाहजाद मोहम्मद अमिनबाट मिड अनमा क्याच आउट भएका थिए ।