एजेन्सी – घरेलु टोली युएईले एसिसी यू१९ एसिया कपमा टेस्ट टोली श्रीलंकामाथि दुई विकेटको रोमान्चक जित हात पारेको छ । यो जितसँगै युएईले समूह बी बाट शीर्ष दुईमा रहँदै सेमिफाइनल खेल्ने सम्भावना बलियो बनाएको छ ।

जितको लागि २ सय २१ रनको विजयी लक्ष्य पछ्याएको युएईले ४८.२ ओभरमा ८ विकेट गुमाउँदै पूरा गर्यो । युएईको जितमा तानिश सुरीले ८८ बलमा ४ चौका र ३ छक्कासहित सर्वाधिक ७५ रनको योगदान दिए ।

आयन खान ५० बलमा ३ चौकासहित ३३, अर्याश शर्मा १९ र एथान डी सोल्झा १७ रनमा आउट भए । आयमन अहमद १० र आमार बादामी १७ रनमा नट आउट रहे । श्रीलंकाका गरौका संकेथले १० ओभरमा ३५ रन खर्चेर ३ विकेट लिए ।

त्यसअघि टस हारेर पहिला ब्याटिङको निम्तो पाएको श्रीलंकाले निर्धारित ५० ओभरमा ९ विकेट गुमाउँदै २ सय २० रन बनाएको थियो । श्रीलंकाका निनुरा कलुपहन ८७ बलमा २ चौकासहित ५६ रनमा नट आउट रहे । कप्तान सेनिथ जयवार्डेन ६५ बलमा ३ चौका र २ छक्कासहित ४९ रनमा आउट भए । ओपनर पुलिन्दु परेरा २४, रुसान्दा गेमागे र विश्वा लाहिरु २६–२६ रनमा आउट भए ।

युएईका कप्तान आयन खानले १० ओभरमा १ मेडनसहित ३८ रन खर्चेर २ विकेट लिए । ओमैद रहेमानले १० ओभरमा ४८ रन खर्चेर २ विकेट लिए । आमान अहमद, ध्रुब परेशार र हार्दिक पैले एक एक विकेट लिए ।

युएई पहिलो खेलमा बंगलादेशसँग ६१ रनले पराजित भएको थियो । अन्तिम खेल युएईले बुधबार जापानसँग खेल्नेछ । उता श्रीलंकाले पहिलो खेलमा जापानलाई ७ विकेटले हराएको थियो । अन्तिम खेल बुधबार श्रीलंकाले बंगलादेशसँग खेल्नेछ ।