काठमाडौं (हाम्रो खेलकुद) – नेपालले आगामी महिना दक्षिण अफ्रिकामा हुने आइसिसी यू–१९ विश्वकपको वार्मअप खेल वेस्टइन्डिज र स्कटल्यान्डसँग खेल्ने भएको छ । आइसिसीले वार्मअप खेलको तालिका सार्वजनिक गरेको छ । नेपालले १३ जनवरीमा स्कटल्यान्ड र १६ जनवरीमा वेस्टइन्डिजसँग वार्मअप खेल्नेछ ।

वार्मअप विश्वकप अघिको अन्तिम तयारी खेल हो । वार्म अप खेलमा नेपालले आफ्नो टोलीमा भएका पुरै १५ खेलाडीलाई खेलाउन सक्छ । ब्याटिङ र बलिङमा फरक फरक खेलाडी खेलाउन पाउँछ । वार्मअप खेलमा प्लेइङ-११ को खेलाडी खेलाउने भन्ने हुँदैन ।

विश्वकप अव १९ जनवरी देखी ११ फेब्रअरी सम्म हुने भएको छ । नेपालको समूह डी मा न्युजिल्यान्ड, पाकिस्तान र अफगानिस्तान छन् । नेपालले पहिलो खेल २१ जनवरीमा न्युजिल्यान्डसँग खेल्नेछ ।

२४ जनवरीमा नेपालले पाकिस्तानसँग खेल्नेछ । समूह चरणको अन्तिम खेल २६ जनवरीमा अफगानिस्तानसँग खेल्नेछ । हरेक समूहका शीर्ष तीन टोली सुपर ६ मा पुग्नेछन् । समूह ए मा भारत, बंगलादेश, आयरल्यान्ड र अमेरिका छन् ।

समूह बी मा इंग्ल्यान्ड, दक्षिण अफ्रिका, वेस्टइन्डिज र स्कटल्यान्ड छन् । समूह सी मा अष्ट्रेलिया, श्रीलंका, जिम्बावे र नामिबिया छन् । समूह ए र डी का टोली सुपर ६ खेल्नेछन् । समूह बी र सी का सुपर सिक्समा हुनेछन् । हरेका समूहमा पुछारका टोलीले १२ देखी १६ औं स्थानमा लागि प्लेअफ खेल्नुपर्ने हुन्छ ।